"ხვალ ავირჩევთ ახალ თავმჯდომარეს, ძალიან მაგარ ბიჭს და ყველაფერი კარგად იქნება", — ასე გამოეხმაურა ქართული ოცნების დეპუტატი, ირაკლი ზარქუა 16 იანვარს დაგეგმილ პარტიის ყრილობას.

"არანაირი დაპირისპირება არ არის და არ ვიცი მავანს, რატომ სურს ეს. დღეს, როგორც არასდროს, ისე სჭირდება გამოწვევებს, რომ ერთიანი იყოს გუნდი. გუნდი არის ერთიანი. ყველა ლიდერი არის ფორმაში, ყველა ლიდერს აქვს თავისი ფუნქცია. ასე რომ, ჩვენ ერთად გადავლახავთ ამ გამოწვევებს. ხვალ ავირჩევთ ახალ თავმჯდომარეს, ძალიან მაგარ ბიჭს და ყველაფერი კარგად იქნება", — განაცხადა ზარქუამ.

ბიძინა ივანიშვილის პოლიტიკიდან ხელმეორედ წასვლის შემდეგ ქართული ოცნების თავმჯდომარის პოსტი ვაკანტური გახდა. პარტიამ აღნიშნულ პოსტზე პარლამენტის ყოფილი თავმჯდომარე და ამჟამად უმრავლესობის ლიდერი, ირაკლი კობახიძე წარადგინა. 16 იანვარს პარტიის დელეგატები მას ოფიციალურად აირჩევენ. გარდა ამისა, დასახელდება პოლიტსაბჭოს შემადგენლობაც.