დიმიტრი ცინცაძის ფილმი შინდისი პოპულარულ ამერიკულ სტრიმინგ პლატფორმა HBO GO-ზე განთავსდა. ქართული კინემატოგრაფიული ნამუშევრის ნახვა შესაძლებელი იქნება ევროპის კონტინენტზე მცხოვრები კინომოყვარულებისთვის.

აგვისტოს ომის თემაზე შექმნილი ფილმი 2019 წელს გამოვიდა. კინოსურათის შექმნის იდეის ავტორი და პროდიუსერი ედმონდ აბაშიძე-მინაშვილია, სცენარი კი ირაკლი სოლომონაშვილს ეკუთვნის. სიუჟეტი ნამდვილ ამბავს — 2008 წლის რუსეთ-საქართველოს ომის დროს მომხდარ ტრაგედიას — ეფუძნება, რომელსაც 17 ქართველი ჯარისკაცის სიცოცხლე ემსხვერპლა.

შინდისმა გამოსვლისთანავე მიიქცია კინომოყვარულებისა და კრიტიკოსების ყურადღება. ფილმი საქართველოდან წარდგენილი იყო ამერიკის კინოაკადემიის დაჯილდოებაზე (ოსკარზე), საერთაშორისო სრულმეტრაჟიანი ფილმის ნომინაციაში. ნამუშევარმა განსაკუთრებული მოწონება დაიმსახურა ვარშავის კინოფესტივალზე, სადაც ფილმმა ღონისძიების გრან-პრი, დიმიტრი ცინცაძემ კი საუკეთესო რეჟისორის ჯილდო მიიღო. 2019 წელს შინდისი ჰოლივუდში გამართული Asian World Film Festival-ის პრიზიორიც გახდა, სადაც ორმოცდაათამდე ქვეყნის რჩეული კინონამუშევრები იყო წარდგენილი.

გასულ წელს ფილმი, რომლის IMDb (კინოფილმების ინტერნეტ-მონაცემთა ბაზა) რეიტინგი 8,5-ს შეადგენს, მსოფლიოს 20 ქვეყანაში აჩვენეს. შინდისის ქართული ტელეპრემიერა თებერვალშია დაგეგმილი.

ასევე იხილეთ: