მუშაობა პირველ ქართულ-ფრანგულ ანიმაციაზე ჯიბის კაცი დასრულებულია და ის უკვე მზად არის მსოფლიოს სხვადასხვა საერთაშორისო ფესტივალებზე გასამგზავრებლად.

ანიმაციის შექმნაზე ახალგაზრდა ქართველმა ილუსტრატორმა ანა ჩუბინიძემ იმუშავა და მისი ქრონომეტრაჟი შვიდი წუთია.

ფილმი პატარა კაცის, ედგარის ისტორიას გვიყვება, რომელიც ძველ ჩემოდანში ცხოვრობს, რომელსაც უსინათლო ადამიანი გახსნის და შიგნით ედგარს აღმოაჩენს, რის შემდეგაც ისინი განუყრელი მეგობრები ხდებიან, პატარა კაცი კი მეგობრის ჯიბეში გადასახლდება.

ავტორი ამბობს რომ, ფილმის შექმნის იდეა 3 წლის წინ გაუჩნდა. იდეის ხორცშესხმასა და ჯიბის კაცის გაცოცხლებაზე კი ფრანგულმა ანიმაციურმა სტუდიამ Folimage და ქართულმა სტუდიამ Kvali XXI ერთად იმუშავეს.

ანიმაციური ფილმის მსოფლიო პრემიერა მალე შედგება, სექტემბერში კი მას ქართველი მაყურებელი ნიქოზის ანიმაციური ფილმების საერთაშორისო ფესტივალზე იხილავს.