მოქალაქეების ლიდერის, ალეკო ელისაშვილის განცხადებით, რიგგარეშე არჩევნები "ერთჯერადი აქტია", ხოლო იმისთვის, რომ არჩევნებმა სანდოობა დაიბრუნოს, საარჩევნო წესების ფუნდამენტური ცვლილება "სამარადჟამოა".

"დანარჩენი ოპოზიციონერები თუ უფრო მეტი პასუხისმგებლობით მოეკიდებიან საკითხს, მაშინ იქ უნდა წავიდეთ მეხუთე რაუნდზე და საარჩევნო სისტემის ძირფესვიანი ცვლილებისთვის დეტალურად უნდა დავასრულოთ მუშაობა [...] ეს არის საშვილიშვილო ამბავი, იმიტომ, რომ რიგგარეშე არჩევნები ერთჯერადი აქტია და ცვლილება ფუნდამენტური საარჩევნო წესების ეს არის სამარადჟამო, რომ დაიბრუნოს არჩევნებმა სანდოობა", — განაცხადა მან.

11 დეკემბერს მეათე მოწვევის პარლამენტმა ოფიციალურად დაიწყო მუშაობა. ოპოზიციის წარმომადგენლები არჩევნების ლეგიტიმურობას არ აღიარებენ და პარლამენტში არ შედიან. ისინი მოითხოვენ, არა მხოლოდ რიგგარეშე არჩევნების დანიშვნას, არამედ პოლიტმატიმრების გათავისუფლებასა და საარჩევნო ადმინისტრაციის თავმჯდომარის, თამარ ჟვანიას გადაყენებას.

ოპოზიციონერებმა მანდატების გაუქმების შესახებ ცესკოს უკვე მიმართეს. სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.