ელიტარული კერძო სკოლა და კალიფორნიის სოლედადის ციხე ერთმანეთისგან სრულიად განსხვავებული სამყაროებია. შტატის ყველაზე უხვპატიმრიანი ციხე და სალინასში, კალიფორნიაში მდებარე Palma-ს სკოლა ბოლო შვიდი წლის განმავლობაში მკითხველთა კლუბმა დააკავშირა, გამოსასწორებელ დაწესებულებასთან პარტნიორობის მიზანი პატიმრებისა და სტუდენტების შეკავშირება და ურთიერთგაგების განმტკიცება იყო.

თუმცა კლუბი ცოდნისა და ემპათიის გაზიარებაზე უფრო მნიშვნელოვან წამოწყებად იქცა.

Palma-ს სტუდენტს სწავლის საფასურის გადახდასთან დაკავშირებით პრობლემა შეექმნა, $1 200 მოძიება მოზარდის მშობლების გადაუდებელი სამედიცინო ხარჯების გამო თავსატეხად იქცა, რომლის გადაწყვეტაც პატიმრებმა გადაწყვიტეს.

"თავიდან არ დავიჯერე. მათ თქვეს, რომ სტუდენტების ვიზიტებს აფასებდნენ და სურდათ სკოლას დახმარებოდნენ, ამიტომ დამავალეს ისეთი სტუდენტის პოვნა, რომელსაც სწავლის გადასახადის გადახდაში დახმარება სჭირდებოდა", — აღნიშნა ინგლისურისა და თეოლოგიის მასწავლებელმა, ჯიმ მიჩელეტიმ, რომელმაც მკითხველთა კლუბი შექმნა.

პატიმრებმა, რომელთაც პროგრამა მოიხსენიებს, როგორც "საძმო ლურჯებში" $30 000-მდე შეაგროვეს და ერთ-ერთ სტუდენტს სკოლის დამთავრების და ხელოვნების აკადემიაში სწავლის გაგრძელების შესაძლებლობა მისცეს.

"ადამიანები ცუდ არჩევანს აკეთებენ, მაგრამ სურთ რაღაც კარგის თანამონაწილედ იქცნენ. ამ ბიჭებს სწორედ ეს სურვილი ამოძრავებდათ", — განაცხადა ჯეისონ ბრაიანტმა, ყოფილმა პატიმარმა, რომელიც პატიმრებს დაფინანსებისთვის საჭირო თანხის მოძიებაში ეხმარებოდა.