ოკუპირებულ გალის რაიონში მოქმედი ტელევიზიის გალ TV-ს ცნობით, ხანძარია სოფელ სიდა, რეფსა და ბარღებში. მედიის ინფორმაციით, ტყის მასივი იწვის, ცეცხლის ჩაქრობას კი ხელს ძლიერი ქარი უშლის. აფსნიპრესის კი იუწყება, რომ ხანძრების გამო, რაიონში საგანგებო მდგომარეობა გამოცხადდა.

ე.წ. საგანგებო სიტუაციების მართვის სამსახურის გალის სახანძრო სამსახურის უფროსის, ემირ ზუხბაიას განცხადებით, ხანძრის რამდენიმე კერა გალის რაიონის რამდენიმე სოფელსა და ქალაქის მიმდებარედაა. მისი თქმით, სიტუაცია კონტროლს ექვემდებარება. ის, ასევე, ამბობს, რომ გალელი მეხანძრეების დასახმარებლად დამატებითი ძალები ოჩამჩირიდან და გულრიფშიდან გამოიძახეს.

გალ TV-ს თანახმად, ხანძარი იქვე მდებარე სახლებსა და ხის ნაგებობებზეც გავრცელდა. არსებული სიტუაციის გამო მედიის ცნობით, ადგილობრივი მოსახლეობის ევაკუაცია გამოცხადდა. მათივე ინფორმაციით, ხანძრის ჩაქრობის სამუშაოები ამ დრომდე გრძელდება.

ხანძარია მოსაზღვრე სამეგრელოსა და საქართველოს სხვა მუნიციპალიტეტებში.