Eurasianet-ის ინფორმაციით, ნავთობის ფასის კლებამ და ეროვნული ვალუტის დევალვაციამ აზერბაიჯანში სამუშაო ადგილების მკვეთრი შემცირება გამოიწვია. თუმცა, არსებული პოლიტიკური ვითარების გათვალისწინებით, ზოგიერთი კომპანია სამსახურიდან გაშვებული თანამშრომლების რაოდენობის გასაჯაროებისგან თავს იკავებს.

აზერბაიჯანის ეკონომიკის მოულოდნელმა ნგრევამ უმსხვილესი კომპანიების წარმოების ტემპები შეაჩერა. ისეთი მსხვილი ორგანიზაციებიც კი, როგორებიცაა ელექტრო მწარმოებელი Azerenerji, გაზის მწარმოებელი Azerigas, ენერგო კომპანია SOCAR და მობილური ოპერატორი Azercell, იძულებულები გახდნენ სამუშაო ადგილები შეემცირებინათ.

გამოცემის ინფორმაციით, კომპანიების უმრავლესობა, რომლებმაც თანამშრომლების რიცხვი შეამცირეს, ქვეყანაში არსებულ ეკონომიკაზე საუბარს თავს არიდებს. უკანასკნელ თვეებში აზერბაიჯანში 7 ბანკი დაიხურა. ადგილობრივი მთავრობა იმ მუზეუმების დახურვასაც გეგმავს, რომლებიც, მისი თქმით, "არაეფექტიანად" მუშაობენ. ასევე კულტურის სფეროში არსებული იმ ორგანიზაციების მუშაობის შეწყვეტაც იგეგმება, რომელსაც, ხელისუფლების აზრით, შემოსავალი არ გააჩნიათ.

შრომის ბაზარზე მდგომარეობის გაუარესების შესახებ ცვლილება ოფიციალურ სტატისტიკაში არ ასახულა. სტატისტიკის დეპარტამენტი უკვე რამდენიმე წელია ავრცელებს ინფორმაციას, რომ ქვეყანაში უმუშევართა რაოდენობა მხოლოდ 5%-ია.

იანვარში შრომისა და სოციალური დაცვის მინისტრმა განაცხადა, რომ მთავრობას ესმის არსებული ვითარების სირთულე და სამსახურიდან დათხოვილი ადამიანებისათვის გადასამზადებელი კურსების ჩატარებას აპირებს. თუმცა, მოსახლეობის ნაწილს ამის არ სჯერა.

პარვიზ გეიდაროვი, ექსპერტი ეკონომიკის საკითხებში, აღნიშნავს, რომ 2004 წლიდან აზერბაიჯანმა 50 მილიარდი მანათი (დაახლოებით 33$ მილიარდი) რეგიონის ეკონომიკური განვითარების სტიმულირებაზე დახარჯა. მისი თქმით, შედეგები არაერთგვაროვანი იყო. გეიდაროვი ასევე აღნიშნავს, რომ ამ ეტაპზე მთავრობას ფინანსების გამოყოფის საშუალება აღარ აქვს, მით უფრო მაშინ, როდესაც Brent-ის მარკის ნავთობზეც კი ბარელის ფასი 33$-ზე დაბლა ჩამოვიდა. აღნიშნული მაჩვენებელი ნავთობის ორი წლისწინანდელ საშუალო ფასს 70%-ით ჩამოუვარდება.

იანვარში აზერბაიჯანის სხვადასხვა ქალაქში საპროტესტო აქციები მოეწყო. დემონსტრანტები ქუჩაში მანათის დევალვაციისა და უმუშევრობის წინააღმდეგ გამოვიდნენ.

გამოცემის ინფორმაციით, ადგილობრივი მთავრობა სასოფლო-სამეურნეო სფეროში(სადაც ქვეყნის შრომისუნარიანი მოსახლეობის 37%-ია დასაქმებული) ახალ ინიციატივებს განიხილავს. ამავე საკითხზე აზერბაიჯანი მოლაპარაკებებს უკრაინასთან, ჩინეთთან და იაპონიასთან აწარმოებს.

სულ ცოტა ხნის წინ კი, აშშ-ს მთავრობის დახმარებით, აზერბაიჯანის ერთ-ერთ რეგიონში რძის საწარმო გაიხსნა, რომელიც, სავარაუდოდ, 1200 სამუშაო ადგილს შექმნის. ასევე გაფართოებას აპირებს შაქრის მწარმოებელი ქარხანაც.