ეროვნული ბიბლიოთეკის მოძრაობა „ეკვილიბრიუმი“, პანდემიის მიუხედავად, მთელი წლის განმავლობაში აქტიურად აგრძელებდა სოფლის ბიბლიოთეკების განახლებას, მოსწავლეებისა და სტუდენტების მხარდაჭერას წიგნებითა თუ კომპიუტერული ტექნიკით. ეს განსაკუთრებით საშური საქმე აღმოჩნდა დისტანციური სწავლების პირობებში, როცა ბევრი ახალგაზრდა ინტერნეტისა და კომპიუტერის უქონლობის გამო სასწავლო პროცესს მიღმა დარჩა.

ფოტო: ეკვილიბრიუმი

მოძრაობა "ეკვილიბრიუმის" 2020 წლის ბოლო გაჩერება წეროვანის დევნილთა დასახლება აღმოჩნდა. წეროვანში მდებარე ახალგორის დევნილი ბიბლიოთეკა განახლებულია და მას ახალი სამკითხველო დარბაზიც აქვს.

ფოტო: ეკვილიბრიუმი

"ეკვილიბრიუმის" დამფუძნებელი, ეროვნული ბიბლიოთეკის გენერალური დირექტორი გიორგი კეკელიძე ასე მიმართავს წეროვანში მცხოვრებ ახალგაზრდებს და არა მხოლოდ მათ:

"გილოცავთ დამდეგ ახალ წელს!
ახლა წეროვანში ვართ, ახალგორის დევნილ ბიბლიოთეკაში. ამ შესანიშნავ ბავშვებს ახალი წიგნებით დიდი ახალგაზრდული სამკითხველო მოვუწყვეთ. კარგი ამბავი ის არის, რომ ამ საქმეში ჩვენს საგანმათლებლო მოძრაობას ამჯერად PASHA Bank Georgia დაეხმარა და იძულებით გადაადგილებულ თანამოქალაქეებთან ამიერიდან არაერთხელ ჩავალთ“.