ელენე ხოშტარიას განცხადებით, არ აპირებს სხვა პარტიაში გადასვლას, მათ შორის, არც გირჩში და ახსნა, რომ ჯაფარიძესთან იდეოლოგიური განსხვავება აქვს.

"პარტიულ ხაზებს მიღმა თანამშრომლობა ძალიან მნიშვნელოვანია და მათ შორის, ზურასთან თანამშრომლობა იმიტომ, რომ მისი ფორმა პოლიტიკის კეთების ჩემთვის ძალიან პატივსაცემია, მომხიბვლელია და ბევრ საკითხზე მასთან ვაპირებ თანამშრომლობას ისევე, როგორც სხვებთან. თუმცა, არ ვგეგმავ სხვა პარტიაში გადასვლას. გულწრფელად ვთქვათ, იდეოლოგიურად ჩემსა და ზურას შორის არის განსხვავებები, მე უფრო ცენტრისკენ მოვიაზრებ თავს. აბსოლუტურად არ არის აუცილებელი გავერთიანდეთ ერთი პარტიის ქვეშ, მაგრამ თანამშრომლობა მნიშვნელოვანია", — განაცხადა ელენე ხოშტარიამ.

ელენე ხოშტარიამ პარტია ევროპული საქართველო დატოვა. ამის შესახებ პარტიაში გამართულ ბრიფინგზე თავად განაცხადა. მისი თქმით, პარტიაში დაპირისპირება არ ყოფილა, შესაბამისად, ეს არ გახმდარა ამ გადაწყვეტილების მიზეზი.

"მივიღე გადაწყვეტილება დავიწყო დამოუკიდებელი პოლიტიკური ცხოვრება, არ გადავდივარ სხვა პარტიაში და ძალიან მყარად ვრჩები ოპოზიციურ ერთობაში. არც კი განვიხილავ პარლამენტში შესვლას და ჩემი პოზიცია რჩება იგივე. მაქვს ახალი გეგმები პოლიტიკურ ცხოვრებაში, ახალი პლატფორმის და პოლიტიკური ძალის შექმნა", — განაცხადა ხოშტარიამ.

ელენე ხოშტარია 2016-2020 წლებში საქართველოს მე-9 მოწვევის პარლამენტის წევრი იყო. 2017 წელს ევროპულმა საქართველომ თბილისის მერობის კანდიდატად წარადგინა. რაც შეეხება 2020 წლის საპარლამენტო არჩევნებს, აქ ხოშტარია ვაკის მაჟორიტარულ ოლქში ოპოზიციის დეპუტატობის კანდიდატი იყო.