ქართული ოცნების დეპუტატისა და იუსტიციის ყოფილი მინისტრის, თეა წულუკიანის განცხადებით, როგორ შეიძლება საქართველოში აღზრდილი ადამიანი იყოს კონკურენტუნარიანი, როდესაც სკოლის სახელმძღვანელოებში ფაქტობრივი ცდომილებებია. წულუკიანის თქმით, არის კონკრეტული თემები, რაზეც მათ გამოძიებაც დაიწყეს.

"როგორი ადამიანის აღზრდა არის ჩვენი მიზანიო, იკითხა ჩემმა მოადგილემ, გიორგი ამილახვარმა და რა თქმა უნდა, ვეთანხმები პრემიერმინისტრის [გიორგი გახარიას] პასუხს. ძნელია არ დაეთანხმო, რომ ჩვენ გვინდა აღვზარდოთ კონკურენტუნარიანი თაობა, სხვანაირად ეს ქვეყანა ვერ განვითარდება. თუმცა, როგორ შეიძლება იყოს ჩვენ მიერ აღზრდილი ადამიანი კონკურენტუნარიანი, თუ, მაგალითად, სკოლის სახელმძღვანელოებში არის არაერთი ცდომილება და ფაქტობრივი შეცდომა, როდესაც საქმე ეხება ჩვენს სამშობლოსა და ჩვენი სამშობლოს ისტორიას. არის თემები, რაზეც ჩვენ გამოძიებებიც დავიწყეთ და სახელმძღვანელოები ამ თემებზე სხვანაირად საუბრობენ", — განაცხადა წულუკიანმა პარლამენტის რიგგარეშე სესიის პლენარული სხდომაზე.

მისივე თქმით, ეს ფაქტობრივი ცდომილებები შეიძლება მათ ეჩვენებათ და არ არის. ამიტომ, ამბობს, რომ, თუ ისტორიკოსებიც დაეთანხმებოდნენ, ალბათ, სახელმძღვანელოებში რაღაცები გასასწორებელი იქნებოდა.

წულუკიანი, ასევე, ინიციატივით გამოდის სახელმძღვანელოების ის ადგილი გადაიხედოს, რომელიც მშობლების და არა მხოლოდ მშობლების კრიტიკას იწვევს. მმართველი პარტიის დეპუტატი აღნიშნავს,რომ მაგრამ მთავარი მაინც არის ის, რომ ამ სახელმძღვანელოებში უნდა იყოს ეროვნული სულისკვეთება. წულუკიანის თქმით, ეროვნული თვითშეგნების გარეშე ძნელია ბრძოლაში ოკუპირებულმა პატარა ქვეყანამ გაიმარჯვოს.