იუსტიციის ყოფილმა მინისტრმა და მე-10 მოწვევის პარლამენტის განათლების კომიტეტის ხელმძღვანელმა, თეა წულუკიანმა პარლამენტის რიგგარეშე სესიის პლენარული სხდომაზე ისაუბრა იმაზე, რაც წინა მოწვევის პარლამენტის დროს გაკეთდა და აღნიშნა, რომ დროა, უფრო წინ წავიდნენ.

"რაც გავაკეთეთ კარგია, მაგრამ როგორც ჩვენი დიდი სპორტსმენები იტყვიან, ახლა დროა, რომ უფრო მაღლა, უფრო სწრაფად და უფრო ძლიერად ჩვენმა კომიტეტმა და ასევე, განათლების სამინისტრომ ვიმუშაოთ და ეს დევიზი, იქნებ, ოლიმპიელებმა ჩვენ დროებით გვათხოვონ", — განაცხადა წულუკიანმა.

დღეს მე-10 მოწვევის ერთპარტიული პარლამენტის რიგგარეშე სესიის პლენარული სხდომა იმართება, სადაც პრემიერმინისტრობის კანდიდატმა, გიორგი გახარიამ მომავალი მთავრობის პროგრამა წარადგინა. ასევე, დღეს დამტკიცდება მინისტრთა კაბინეტი, რომლის ყველა წარმომადგენელი ქართული ოცნების წევრი იქნება.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.