ტაილანდში, ჩანტაბურის პროვინციაში, სპლიყვს, რომელიც გზას კვეთდა, მოტოციკლი დაეჯახა და რომ არა მაშველი, რომელმაც გულ-ფილტვის რეანიმაცია ჩაუტარა, იგი ვერ გადარჩებოდა.

მაშველი, სახელად მანა სრივატი, რომელიც იმ დროისათვის არ მუშაობდა, აღნიშნავს, რომ საკუთარი კარიერის განმავლობაში ათობით ადამიანისთვის დაუბრუნებია სიცოცხლე, თუმცა არასდროს — სპილოსთვის.

ვიდეოში, რომელიც ინტერნეტში ვირუსულად გავრცელდა, სრივატი გზაზე მარჯვენა მხარით მწოლიარე სპილოს ორივე ხელით უკეთებს გულ-ფილტვის რეანიმაციას, ათი წუთის შემდეგ კი სპლიყვი ფეხზე დგება.

ვიდეოჩანაწერში ასევე ჩანს, როგორც ეხმარებიან სრივატის თანამშრომლები მოტოციკლისტს, რომელიც სერიოზულად არ დაშავებულა. მანა კი აღნიშნავს, რომ სპლიყვი მის კარიერაში ასევე პირველი იყო, რომელსაც გულ-ფილტვის რეანიმაცია ჩაუტარა.

გაფრთხილება: ვიდეო, შესაძლოა, შეიცავდეს სენსიტიურ კადრებს ზოგიერთი მკითხველისათვის.

მანა, რომელიც 26 წელია, მაშველია, ამბობს, რომ გზაზე გადაადგილებისას სამსახურებრივ მოვალეობას არ ასრულებდა, თუმცა, როგორც აღნიშნავს, იგი "ინსტინქტურად მოქმედებს სიცოცხლის გადასარჩენად".

"მთელი ეს ხანი ძალიან განვიცდიდი, რადგან მესმოდა, როგორ უხმობდნენ დედა და სხვა სპილოები მას", — დასძენს იგი, — "ადამიანზე ცოდნის და ინტერნეტში ნანახი ვიდეოს მიხედვით განვსაზღვრე, სად იქნებოდა სპილოს გული; შემდეგ კი, როცა სპლიყვი წამოდგა, ლამის ვიტირე".

გამოცოცხლების შემდეგ პატარა მკურნალობის გასაგრძელებლად წააცუნცულეს, მერე კი დედამისის გამოჩენის იმედით კვლავ შემთხვევის ადგილზე დააბრუნეს. მანას თქმით, იმედი გამართლდა — სპლიყვის დაძახებისთანავე დედა-დეიდების საზოგადოება მასთან გაჩნდა.