9 წლის ბიჭმა, რომელმაც YouTube-ზე სათამაშოების შეფასებითა თუ სხვა შინაარსის ვიდეოებით 2020 წელს თითქმის 30 მილიონი დოლარი გამოიმუშავა, წლის ყველაზე მაღალანაზღაურებადი იუთუბერის სტატუსი მოიპოვა.

რაიან კაჯი, რომელიც აშშ-ში, ტეხასის შტატში ცხოვრობს, ცნობილია თავისი YouTube-ის არხით Ryan’s World (რაიანის სამყარო), სადაც ვიდეოებს თავისი ოჯახის წევრების მონაწილეობით აქვეყნებს და ხშირად სხვადასხვა ბრენდის პროდუქციას უკეთებს რეკლამას.

რაიანმა YouTube-ზე ვიდეოების გამოქვეყნება 2015 წლიდან დაიწყო, როცა მოულოდნელად დედას ჰკითხა: "რატომ არ ვარ მეც სხვა ბავშვებივით YouTube-ზე?" დღეს კი მას ამ პლატფორაზე სულ ცხრა არხი აქვს, რომელთაც 27 მილიონზე მეტი გამომწერი ჰყავს.

რაიან კაჯის ყველაზე პოპულარულ ვიდეოს ორ მილიარდზე მეტი ნახვა აქვს და ის YouTube-ის ყველა დროის ყველაზე პოპულარულ 60 ვიდეოს შორისაა.

წლის ყველაზე მაღალშემოსავლიანი იუთუბერების სია გამოცემა Forbes-მა გამოაქვეყნა და ჯამში ტოპ ათეულში მოხვედრილმა ადამიანებმა გასული წლის განმავლობაში $211 მილიონის გამომუშავება შეძლეს.

როგორც The Guardian წერს, ამ საკითხზე საუბრისას ნევადას უნივერსიტეტში სოციალური მედიისა და ჟურნალისტიკის ასისტენტი პროფესორი ბენჟამინ ბეროუზი გარკვეული საფრთხეების შესახებაც გვაფრთხილებს: ხშირად ბავშვები ისე ექცევიან მსგავსი "ბავშვი ინფლუენსერების" გავლენის ქვეშ, რომ ამას მშობელი შეიძლება ვერც კი ხვდებოდეს.