ორი დღის წინ აფრიკის დასახლებაში დაკავებულ ვანო ფოცხვერაშვილს სასამართლომ აღკვეთის ღონისძიების სახით 10 000 ლარიანი გირაო შეუფარდა.

"იქიდან გამომდინარე, რომ პროკურატურამ სასამართლოს პატიმრობის მოთხოვნით მიმართა. ჩვენ მოვითხოვეთ მინიმალური გირაო, მაგრამ სასამართლომ 10 000 ლარის ოდენობით განსაზღვრა. ედავებიან სისხლის სამართლის კოდექსის 353 მუხლის პირველ ნაწილს, რაც პოლიციისადმი დაუმორჩილებლობას გულისხმობს", — განაცხადა ფოცხვერაშვილის ადვოკატმა.

ადვოკატის თქმით, გაივლის კონსულტაციებს ოჯახთან და გადაწყვეტენ, გაასაჩივრებენ თუ არა სასამართლოს გადაწყვეტილებას.

15 დეკემბერს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დააკავეს 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს.

ამავე თემაზე: