ქართული ოცნების ერთ-ერთი ლიდერი, მამუკა მდინარაძე ამბობს, რომ სახელმწიფო უკანონობაზე თვალს ვერ დახუჭავს და მით უმეტეს, ვერც უკანონობას დააკანონებს, ისევე როგორც ვერ წაახალისებს მას. მდინარაძის თქმით, ხელისუფლება შესაძლებლობების მაქსიმუმის ზღვარზე ეხმარება ყველა ადამიანს, რომელსაც საცხოვრისი არ აქვს.

"გუშინ არ მომხდარა არც ერთი ადამიანის საცხოვრებელი ბინიდან გამოსახლება — ეს შეგნებულად გავრცელებული ცრუ ინფორმაციაა. ყველა შენობა, რომლის დემონტაჟიც მოხდა, იყო უკანონო და ამავე დროს მშენებარე [და არა დასრულებული] ნაგებობა. კახი [კალაძე] ყოველთვის გამორჩეულია იმით, რომ შეუძლია იყოს სახელმწიფო ინტერესების გამტარებელი, ძალიან პრინციპული და ამავდროულად, ყველა გააკვირვოს თავისი ჰუმანურობით", — განაცხადა მდინარაძე.

მისივე თქმით, უკანონო მშენებარე სახლების ყველა მესაკუთრე მოსალოდნელი სამართლებრივი რეაგირების შესახებ წინასწარ იყო გაფრთხილებული.

თბილისში, აფრიკის დასახლებაში ქალაქის მერიამ შენობა-ნაგებობების დემონტაჟი გუშინ, 15 დეკემბერს დაიწყო. მერიის განცხადებით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 შემთხვევა გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დააკავეს 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს. პასუხად ადგილობრივებმა განაცხადეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

მერიის გადაწყვეტილებაზე საზოგადოების კრიტიკის შემდეგ კალაძემ გადაწყვიტა გავრცელებული ფოტოს გმირებს ბინა აჩუქოს.

გაიგეთ მეტი: