როგორც კი დეკემბერი დადგება (ხშირად უფრო ადრეც კი), მსოფლიოს სხვა მრავალი ქვეყნის მსგავსად, საქართველოშიც ტრადიციულად უცვლელ პოპულარობას იბრუნებს ხოლმე მერაია ქერის All I Want for Christmas is You, ფრენკ სინატრას Let it Snow თუ ჟოზე ფელისიანოს Feliz Navidad.

საერთშორისო ჰიტებთან ერთად არაერთი ქართული სიმღერაცაა, რომლებიც ჩვენს სადღესასწაულო განწყობაზე განსაკუთრებულად მოქმედებს და ხშირად ყველაზე ნოსტალგიურ, ბავშვობის მოგონებებს გვიღვიძებს.

ამ სტატიაში სწორედ რამდენიმე ასეთ გამორჩეულ კომპოზიციას მოვუყარეთ თავი.

1. სტეფანე — ჯადოსნური ღამე

ქართულ საახალწლო სიმღერებზე საუბრისას რთულია, პირველი სწორედ ჯადოსნური ღამე არ გაგახსენდეს. მართალია, სტეფანე მელოდიას ჯორჯ მაიკლის 1984 წელს ჩაწერილ ლეგენდარულ სიმღერას Last Christmas დაესესხა, თუმცა გადაჭარბება არ იქნება, თუ ვიტყვით, რომ საქართველოში მისმა შესრულებამ უფრო მეტი მსმენელის გული მოიგო.

2. სახე — თოვლი მოსულა

ამ ჯგუფის თითქმის ყველა ჰიტი ათწლეულების შემდეგაც არავის უთმობს ადგილს მრავალი ქართველი მსმენელის გულებში და გამონაკლისი, ცხადია, არც მათი ეს საახალწლო სიმღერაა.

3. ვაკის პარკი — თოვლის დედოფალი

სიმღერის კომიკურ ტექსტთან ერთად ცალკე აღნიშვნის ღირსია ვიდეოკლიპიც.

4. ირაკლი ჩარკვიანი და ქეთათო — ახალ წელს

ირაკლი ჩარკვიანი ქართველი ჯონ ლენონია, რომელიც გვარწმუნებს, რომ ძველი წყენა გასულ წელს უნდა გავატანოთ, ახალი წელი კი სიყვარულით და უკეთესი სამყაროს იმედით დავიწყოთ.

5. ნუკრი კაპანაძე — კანფეტების თოვლი

ეს სიმღერა არაერთი მომღერლის შესრულებით მოგვისმენია და თითქმის ყველას თანაბრად შეეფერება ეს დახასიათება: ის ყველა ბავშვის საყვარელი სადღესასწაულო სიმღერაა. მეტიც — ბავშვებს, რომლებიც იზრდებიან, მისი ტექსტი არ ავიწყდებათ და ყოველ ახალ წელს ნოსტალგიური განწყობით ღიღინებენ ხოლმე.

6. ირაკლი უჩანეიშვილი და ლენა რაქვიაშვილი — ფიფქები ცვივა და ფიფქები მღერიან

კანფეტების თოვლის გვერდით რთულია, ეს სიმღერა არ გაგახსენდეს, რომელსაც განსაკუთრებულ ჯადოსნურობას იაკობ ბობოხიძის მუსიკა ანიჭებს და საბოლოოდ, მთელი კომპოზიცია დისნეის ანიმაციის საუნდტრეკს ემსგავსება.

7. ბაკურ ბურდული და მეგობრები — გილოცავთ ახალ წელს

ვისაც ახალ წელს ბაღის ან სკოლის ზეიმებზე ერთხელ მაინც მოუწია ლექსის თქმა თუ სიმღერა, მაშინ ეს ვიდეოკლიპიც განსაკუთრებულად ახლობელი იქნება მისთვის.

8. სალომე კორკოტაშვილი — რაც ყველაზე ძალიან გიყვარს

ფილმი რაც ყველაზე ძალიან გიყვარს შეიძლება ბევრს კარგად აღარც ახსოვს, თუმცა სანაცვლოდ სალომე კორკოტაშვილის ეს საუნდტრეკი დღემდე ბევრის საყვარელი სიმღერაა.

9. Soft Eject — Please Just Carry On

ნათელი მაგალითი იმისა, რომ ქართველ მუსიკოსებს ინგლისურენოვანი ტექსტებითაც შეუძლიათ მსმენელისთვის ახლობელი და სასიამოვნო ემოციების მატარებელი სიმღერების შექმნა.

10. ნატო გელაშვილი — დეკემბერი

ეს სიმღერა ვიწროდ საახალწლო განწყობას არ ატარებს, თუმცა პირველი დეკემბრიდან წლის მიწურულამდე ნებისმიერ ხასიათს უხდება.

ბონუსი: ლაშა და თამარი — იუზა

საახალწლო შინაარსზე მეტად ეს სიმღერა ყველაზე ცნობილი ქართული სიტკომის პერსონაჟების გამო უყვართ, მაგრამ იმდენად ბევრი მსმენელი ჰყავს (რაზეც YouTube-ზე ვიდეოს ნახვების ოდენობაც მეტყველებს), რომ ამ სიაში მოხვედრასაც იმსახურებს.