გირჩის ლიდერის, ზურაბ ჯაფარიძის თქმით, სამართლიანი არჩევნების მიერ შესაძლო მათემატიკური შეცდომის დაშვება არ ნიშნავს, რომ საერთო ჯამში არჩევნები კარგად ჩატარდა. TV პირველთან საუბარში ჯაფარიძემ განაცხადა, რომ ოქმების პარალელური დათვლა ვერ ადგენს შესაძლო დარღვევების მნიშვნელოვან ნაწილს.

"შეიძლება სამართლიანმა არჩევნებმა მართლა დაუშვა რაღაც მათემატიკური შეცდომა, მაგრამ, გასაგები უნდა იყოს, რაზე არის საუბარი. საუბარი არის ოქმების პარალელურ დათვლაზე. ოქმების პარალელური დათვლა ვერ ადგენს არჩევნების დროს დარღვევების მნიშვნელოვან ნაწილს. ანუ, შეიძლება დაადგინოს მხოლოდ და მხოლოდ ის, რომ უბნებზე რაღაცები ვერ დააჯამეს, ან უბნებზე რაღაცა მოხდა", — ამბობს ჯაფარიძე TV პირველთან საუბარში.

ჯაფარიძე ჩამოთვლის დარღვევების სახეებს, რომლებიც, მისი თქმით, ოქმების პარალელური დათვლისას ვერ გამოვლინდებოდა.

"უამრავი დისბალანსი იყო ოქმებში, მაგრამ, ამითი ვერ დადგინდება გაყალბების მასშტაბი. ის, რაზეც საუბრობდა ყველა სადამკვირვებლო ორგანიზაცია, მათ შორის, სახელმწიფო დეპარტამენტის კომუნიკეშიც იყო საუბარი, რომ იყო დაშინების ფაქტები, იყო მოსყიდვის ფაქტები; დისბალანსებში ჩანს, რომ ზოგან არის ბიულეტენების დიდი რაოდენობა, რაც ნიშნავს რომ ჩაყრას ჰქონდა ადგილი, ან ის, რომ ბიულეტენების ნაკლებობა არის, რაც ირიბად შეიძლება მიუთითებდეს იმაზე, რომ კარუსელები ტრიალებდა, ამას ყველაფერს პარალელური დათვლა ვერ ადგენს", — ამბობს ზურაბ ჯაფარიძე.

გირჩის ლიდერი მიიჩნევს, რომ მმართველი პარტია სამართლიანი არჩევნების მათემატიკურ შეცდომას პოლიტიკური მიზნებისთვის იყენებს.

"მთელი აქცენტის გადატანა ახლა "ოცნების" მხრიდან იმაზე, რომ სამართლიან არჩევნებს PVT-ში ჰქონდა რაღაცა შეცდომები და ამიტომ, არჩევნები იყო კარგი და შედეგები ვიღაცამ უნდა აღიაროს... პოლიტიკური მიზნებისთვის იყენებენ რეიტინგული არასამთავრობო ორგანიზაციის შესაძლო მათემატიკურ შეცდომას", — განაცხადა ზურაბ ჯაფარიძემ.

ქართული ოცნების აღმასრულებელი მდივნის, ირაკლი კობახიძის განცხადებით, PTV არის ხმების და არა ოქმების პარალელური დათვლა.

ISFED-ის პარალელური დათვლის ხარვეზი

ISFED-ის ცნობით, ხმების პარალელური დათვლის პირველადი შიდა აუდიტის შედეგებმა საარჩევნო სუბიექტების მიერ მიღებული ხმების გამოსათვლელ ფორმულაში ხარვეზი გამოავლინა. ამასთან, როგორც ორგანიზაციაში ამბობენ, აუდიტმა PVT-ს მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.

ქართული ოცნების აღმასრულებელი მდივნის, ირაკლი კობახიძის განცხადებით, ISFED-ის პარალელური დათვლა აჩვენებდა, რომ ცესკომ მეტი შედეგი დაუწერა არა მხოლოდ ქართულ ოცნებას, არამედ პროპორციულად სხვა პოლიტიკურ პარტიებსაც. როგორც მან ბრიფინგზე თქვა, სწორედ ამის გამო ნათელი იყო, რომ PVT-ში (პარალელურ დათვლაში) შეცდომა იყო დაშვებული.

თავდაპირველად, 31 ოქტომბრის არჩევნების პარალელური დათვლის (PVT) შედეგების მიხედვით, ქართულმა ოცნებამ 45,8% აიღო, ხოლო ნაციონალურმა მოძრაობამ 26,4%. 11 დეკემბერს ISFED-ის მიერ გასწორებული მონაცემების მიხედვით კი, ქართულმა ოცნებამ 47,6%, ხოლო ნაციონალურმა მოძრაობამ 27,4% აიღო, რაც ცდომილების ზღვარის გათვალისწინებით ცესკოს მონაცემებთან უფრო ახლოსაა. ცესკოს დათვლით, ქართულმა ოცნებამ ხმების 48,22%, ნაციონალურმა მოძრაობამ კი — 27,17% მიიღო.

ISFED-ის ხელმძღვანელის, ელენე ნიჟარაძის განმარტებით, ISFED-ის პარალელურ დათვლაში გამოვლინდა ხარვეზი იმ კუთხით, რომ საარჩევნო სუბიექტების ხმებთან ერთად დათვლილი იყო ბათილი ბიულეტენები, რამაც ცესკოს მონაცემებთან შედარებით სამი პარტიის შემთხვევაში ცდომილება გამოიწვია. ესენია: ქართული ოცნება, ნაციონალური მოძრაობა და სტრატეგია აღმაშენებელი.

როგორც იგი ამბობს, ეს არის მცირე ხარვეზი, რომელსაც მანდატების გადანაწილებაზე გავლენა არ აქვს. თუმცა, ამავე დროს, აღიარებს, რომ რეპუტაციულად ორგანიზაციისთვის მძიმე დარტყმაა.

გაიგეთ მეტი: