წევრი ქვეყნებისა და ევროპარლამენტის წინასწარი შეთანხმებით ევროპის კავშირი ერაზმუსის საგანმანათლებლო პროგრამის გაფართოებას აპირებს.

პროგრამის დაფინანსება 26 მილიარდ ევრომდე გაიზრდება, 2021 წლიდან 2027 წლამდე კი ერაზმუსის მონაწილეების რაოდენობა გასამმაგდება და 12 მილიონს შეადგენს.

გარდა უმაღლესი განათლებისა, პროგრამა ყველა საფეხურის სასწავლო და საგანმანათლებლო აქტივობაში ჩართულ ადამიანს მოიცავს, ამის ამსახველი კი მისივე სახელი — ერაზმუს+ იქნება.

ერაზმუს+-ის შესახებ წინადადება 2018 წლის მაისში გაჟღერდა, თუმცა ევროპარლამენტსა და ევროკავშირის წევრებს საბოლოო გადაწყვეტილება პროგრამის გაფართოებასთან დაკავშირებით ჯერ კიდევ მისაღები აქვთ.

"ახალი, გაფართოებული პროგრამა 2021-2027 წლებისათვის მეტად ინკლუზიური იქნება. იგი საშუალებას მოგვცემს, მხარი დავუჭიროთ ახალ ინიციატივებსა და მოვიცვათ მეტი ახალგაზრდა", — აცხადებს გერმანიის განათლებისა და კვლევითი საქმიანობის მინისტრი, ანია კარლიჩეკი, — "გვსურს, ევროპა ენთუზიაზმით განვაწყოთ".

ევროპარლამენტის გერმანელი წევრისა და საგანმანათლებლო პოლიტიკის ექსპერტის, პეტრა კამერევერტის თქმით კი, პროგრამა განსაკუთრებით დაეხმარება იმ ახალგაზრდებს, რომლებიც სოციალური მდგომარეობის ან სხვა ხელისშემშლელი ფაქტორების გამო, წარსულში მსგავსი პროგრამით სარგებლობას ვერ ახერხებდნენ.

ერაზმუსის გაფართოებული პროგრამა ასევე მოიცავს მიგრანტებსა და სხვა ქვეყნებში მცხოვრებ ევროკავშირის მოქალაქეებსაც.

საგანმანათლებლო პროგრამამ, რომელიც 30 წლის წინ დაფუძნდა, ევროკავშირის 10 მილიონ მოქალაქეს მისცა საშუალება, ესწავლა, ემუშავა და მოხალისედ ემსახურა საზღვარგარეთ.