აფხაზურმა საზოგადოებრივმა ორგანიზაცია არუაამ ოკუპირებული აფხაზეთის დე-ფაქტო პრეზიდენტს, ასლან ბჟანიას მოუწოდა, საგარეო პოლიტიკის შესახებ მიღებული ახალი კონცეფციიდან 2.3 მუხლი ამოიღოს. ინფორმაცია ამის შესახებ ოკუპირებული აფხაზეთის საგარეო საქმეთა სამინისტრომ გამოაქვეყნა.

აღნიშნული მუხლი კი გულისხმობს:

"აფხაზური მხარე უშვებს შესაძლებლობას, ქართულ-აფხაზურ მხარეებს შორის მრავალდონიანი მოლაპარაკებისთვის დამატებითი ფორმატის არსებობისთვის შეიქმნას პირობები, რომლის ფარგლებშიც შესაძლებელი იქნება ორმხრივი ინტერესის მქონე საკითხების განხილვა და რომლის გადაწყვეტის შესაძლებლობაც ჟენევის საერთაშორისო მოლაპარაკებების ფარგლებში არ ჩანს".

სამინისტროს ინფორმაციით, არუაა აცხადებს, რომ ამ პუნქტის განხორციელება ჟენევის მოლაპარაკებების ფორმატს დაჩრდილავს და მოლაპარაკებების პროცესის სტატუსს შეამცირებს.

გარდა ამისა, ნათქვამია, რომ თუ პირდაპირი მოლაპარაკებების ფორმატზე გადავალთ, აღნიშნულმა პუნქტმა, შესაძლოა, მოლაპარაკებებს საერთაშორისო შუამავლები და მაღალი სტატუსი დააკარგინოს.

ოკუპირებული აფხაზეთის უწყებაში კი აცხადებენ, რომ მრავალდონიანი მოლაპარაკებების დამატებითი ფორმატი ვერანაირად ვერ შეუშლის ხელს და ვერ შეცვლის ჟენევის საერთაშორისო მოლაპარაკებების ფორმატს. ასევე, აღნიშნავენ, რომ აღნიშნულმა პუნქტმა გაიარა სხვადსხვა ორგანოები გაიარა და მხოლოდ შემდეგ დაამტკიცა ბჟანიამ, ასე რომ, არუაას ნათქვამი, რომ კონცეფცია "კაბინეტში ჩუმად მიიღეს" სიმართლეს არ შეესაბამება.