ქართული ოცნების დეპუტატმა, სოზარ სუბარმა განაცხადა, რომ შემდეგი არჩევნები იქნება 2024 წლის ოქტომბერში. ასე უპასუხა მან რუსთავი 2-ის ჟურნალისტის კითხვას იმასთან დაკავშირებით, რომ ოპოზიციისთვის რიგგარეშე არჩევნები არის წითელი ხაზი.

"პარლამენტი არის ფუნქციონალური და იმოქმედებს ჩვეულებრივად. კარგია, როცა პარლამენტში ისმის ერთმანეთის საპირისპირო ხმები. რამდენად მრავალფეროვანი იქნება ოპოზიციური ხმები, ძალიან მალე გაირკვევა. შემდეგი არჩევნები იქნება, 2024 წლის ოქტომბერში", — განაცხადა სოზარ სუბარმა.'

11 დეკემბერს პარლამენტში მე-10 მოწვევის პარლამენტის სხდომა მიმდინარეობს, რომელშიც მხოლოდ ქართული ოცნება იღებს მონაწილეობას. სხდომაზე ასევე არიან მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ. ამასთან, ოპოზიციამ ხელმოწერილი განცხადებები, სიის განულების მოთხოვნით, ცესკო-ში უკვე ჩააბარა.