ქართული ოცნების დეპუტატმა, ირმა ზავრადაშვილმა განაცხადა, რომ "ოცნების" პარლამენტში მარტო მუშაობა დისკომფორტს არ უქმნის და პირიქით, ამაყია, რადგან გამარჯვებას სუფთად მიაღწიეს.

"არანაირ დისკომფორტს არ უქმნის [ქართულ ოცნებას], პირიქით, ამაყი ვარ იმიტომ, რომ ეს გამარჯვება მიღწეულია ძალიან სუფთად, დიდი შრომის შედეგად და ამაყი ვარ იმით, რომ დღეს მე წარმოვადგენ საქართველოს პარლამენტს. საქართველოს პარლამენტი შეჩვეულია ოპოზიციის ბოიკოტს და ქართული ოცნების მარტო მუშაობას", — განაცხადა ირმა ზავრადაშვილმა.

მე-10 მოწვევის პარლამენტის სხდომა ამ წუთებშიც მიმდინარეობს და დღეს უკვე ოფიციალურად დაიწყებს მუშაობს. უკვე რამდენიმე კვირაა, მმართველ პარტიასა და ოპოზიციას შორის მოლაპარაკებები მიმდინარეობს. მართალია, მხარეები დეტალებს არ ასაჯაროებენ, თუმცა ამბობენ, რომ გარკვეულ პუნქტებზე აზრების დაახლოება მოხერხდა. მიუხედავად ამისა, ოპოზიციისთვის "პრინციპული საკითხები", როგორიცაა რიგგარეშე არჩევნები და პოლიტპატიმრების გათავისუფლება, ქართული ოცნებისთვის კვლავ წითელ ხაზად რჩება.