ქართული ოცნების ერთ-ერთმა ლიდერმა, მამუკა მდინარაძემ განაცხადა, მიუხედავად იმისა, რომ ოპოზიცია პარლამენტში შესვლას არ აპირებს, პარლამენტის მაინც, ნებისმიერ შემთხვევაში, გამართულად იმუშავებს.

"მთავარია, დისკომფორტი არ შექმნას სახელმწიფოს და მთავარია, პრობლემები არ შეექმნას, ქვეყნის პარლამენტის ფუნქციონირებას, სახელმწიფოს ფუნქციონირებას. ამას ჩვენ უზრუნველვყოფთ, რომ ასე არ მოხდეს. ნებისმიერ შემთხვევაში პარლამენტი იმუშავებს გამართულად, მაგრამ მე ვიტოვებ იმედს, რომ იფიქრებენ რაციონალურად, სახელმწიფო ინტერესებიდან გამომდინარე და საქართველოს პარლამენტში ჩვენ ვიხილავთ ოპოზიციონერ დეპუტატებს", — განაცხადა მამუკა მდინარაძემ.

მდინარაძემ, ასევე, აღნიშნა, რომ ორივე მხრიდან ისმის განცხადებები, რომ მოლაპარაკებები უნდა გაგრძელდეს და გაგრძელდება.

დღეს პარლამენტის პირველი სხდომა გაიმართება. ამ დროის მონაცემებით, სხდომას მხოლოდ ქართული ოცნების დეპუტატები დაესწრებიან. ის ოპოზიციური პარტიები კი, რომლებმაც ბარიერი გადალახეს და საპარლამენტო მანდატები მოიპოვეს, სხდომის მიმდინარეობის პარალელურად შეკრებას, მანდატებზე საჯაროდ უარის თქმას და ამის შესახებ მემორანდუმის გაფორმებას აპირებს.