ფრიდრიხ ებერტის ფონდის კვლევის მიხედვით, საქართველოში მცხოვრები და გამოკვლევაში მონაწილე ახალგაზრდების აბსოლუტური უმრავლესობა საკუთარ თავს რომელიმე რელიგიურ მიმართულებას აკუთვნებს.

აღნიშნული კვლევის ფარგლებში შეისწავლეს ისეთი დებულებები, როგორიცაა მაგალითად ღმერთის არსებობა, ღმერთის მიერ სამყაროს შექმნა, ღმერთის მიერ მორალური ნორმებისა და მოვალეობების შექმნა.

კვლევის შედეგებით, გამოკითხული ახალგაზრდების აბსოლუტურ უმრავლესობას, ანუ 97 პროცენტს სჯერა ღმერთის არსებობის. ასევე, 80 პროცენტს სჯერა სამოთხისა და ჯოჯოხეთის არსებობის, ამავდროულად შედარებით ნაკლებ წილს, 75 პროცენტს სჯერა იმის, რომ მორალური ნორმები და მოვალეობები ღმერთისგან მომდინარეობს.

კვლევის შედეგების მიხედვით, უმრავლესობა ანუ 85 პროცენტი მართლმადიდებელი ქრისტიანია ხოლო 10 პროცენტი მაჰმადიანი.

მცირე ნაწილი მიაკუთვნებს თავს აპოსტოლურ ეკლესიას 2 პროცენტი, კათოლიკე ქრისტიანს 1 პროცენტი, ათეისტს 1 პროცენტი და სხვა აღმსარებლობას 1 პროცენტი.

ფოტო: ფრიდრიხ ებერტის ფონდი

ასევე, მიღებული მონაცემებით, მცირედი განსხვავებაა სამყაროს ღმერთის მიერ შექმნის რწმენასთან დაკავშირებით. მდედრობითის სქესის წარმომადგენლების 92% აცხადებს, რომ სჯერა აღნიშნული დებულების, ხოლო იგივე მოსაზრებას მამრობითი სქესის 90% იზიარებს.