საქართველოს კულტურისა და ძეგლთა დაცვის სამინისტროს ინფორმაციით, მთავრობის გადაწყვეტილებით, 24 იანვარს, ქართულ ჭიდაობას, როგორც არამატერიალური კულტურული მემკვიდრეობის ძეგლს, ეროვნული მნიშვნელობის კატეგორიის სტატუსი განესაზღვრა.

ჭიდაობა სპორტის უძველესი სახეობაა, რომელიც ფართოდ იყო გავრცელებული საქართველოში.

სამინისტროს ცნობით, ჭიდაობის, როგორც სპორტის ეროვნული სახეობის სიძველეზე მეტყველებს ალავერდის კედელზე შესრულებული ჭიდაობის სცენაც:

"სცენაზე აღბეჭდილი პერსონაჟთა სახეები, სამოსი და მოძრაობის პლასტიკა, ერთმნიშვნელოვნად მიანიშნებს ქართულ ტრადიციულ საჭიდაო ხელოვნებაზე. მსგავსი შეჯიბრება საქართველოში თან სდევდა რელიგიურ დღესასწაულებს".

ქართულ ჭიდაობას არამატერიალური კულტურული მემკვიდრეობის ძეგლის სტატუსი, კულტურული მემკვიდრეობის დაცვის ეროვნულმა სააგენტომ 2014 წელს განუსაზღვრა.