ოპოზიციური პარტიების წარმომადგენლები დღეს ლეიბორისტული პარტიის ოფისში კიდევ ერთხელ შეიკრიბნენ და გუშინ, 4 დეკემბერს, ფასილიტატორ ელჩებთან შეხვედრის შედეგებზე იმსჯელეს.

როგორც ცნობილია, მათ აშშ-სა და ევროკავშირის ელჩებს წარუდგინეს წერილობითი დოკუმენტი, სადაც დაზუსტებულია მათი მოთხოვნები და შეთავაზებები. ერთობლივი კონსულტაციების შემდეგ, ოპოზიციონერი ლიდერები აცხადებენ, რომ ისინი ელოდებიან ასეთივე წერილობით პასუხს ქართული ოცნებისგან.

"ფასილიტატორი ელჩების თხოვნით, წინადადებები, რომლებიც გუშინ ჩვენ წერილობით წარვადგინეთ, თხოვნა არის, რომ, არ გასაჯაროვდეს [...] ვითხოვთ, ანალოგიურად, წერილობით პასუხს ქართული ოცნებისგან, არა ბრიფინგებით და არა რაღაცა კომენტარებით", — განაცხადა ლეიბორისტული პარტიის ოფისში შესვლამდე ევროპული საქართველოს წევრმა, გიგი უგულავამ.

ოპოზიციის განცხადებით, მთავარი მოთხოვნა — რიგგარეშე არჩევნების ჩატარება, კვლავ ძალაშია, თუმცა, თუ ქართული "ოცნება" დათანხმდება წარდგენილი დოკუმენტის შინაარსს, პოლიტიკური კრიზისი განიმუხტება. არსებობს ინფორმაცია, რომ ოპოზიციის შეთავაზებებს შორის არის პლებისციტიც ხელახალი არჩევნების შესახებ.

ოპოზიცია ამბობს, რომ შეხვედრაზე იმსჯელეს მმართველ პარტიასთან პირისპირი მოლაპარაკებების მესამე რაუნდზე, თუმცა მათ დაზუსტებით არ იციან როდის და რა ფორმატში გაიმართება ეს შეხვედრა.