გირჩის ლიდერი, ზურაბ ჯაფარიძე ამბობს, რომ იაგო ხვიჩიას, ვახტანგ მეგრელიშვილსა და ალექსანდრე რაქვიაშვილს კონკრეტული პირობები წაუყენა, რომელიც მათთვის მიუღებელი აღმოჩნდა. ამის შესახებ მან ჟურნალისტებს განუცხადა.

"არ ვიცი, რამდენადაა ეს ულტიმატუმი. მე ვთავაზობდი პირობებს, რა პირობებშიც ჩვენ შეგვეძლო გაგვეგრძელებინა საქმის კეთება, რაზეც მითხრეს, რომ ეს პირობები იყო მიუღებელი და ამის შემდეგ დავამთავრე ამ ადამიანებთან ურთიერთობა", — განმარტა ჯაფარიძემ.

დღეს, 4 დეკემბერს ცნობილი გახდა, რომ პარტია გირჩი გაიყო. ზურაბ ჯაფარიძის თქმით, იაგო ხვიჩიასთან, ვახტანგ მეგრელიშვილთან და ალექსანდრე რაქვიაშვილთან ერთად გირჩის კეთებას აღარ აპირებს. ამის შესახებ ჯაფარიძემ Facebook ჯგუფ გირჩის ბაბლში დაპოსტა.

"სამწუხაროდ, ერთი მხრივ ჩემი, ხოლო მეორე მხრივ იაგოს, ვახოს და სანდროს გზები გაიყო. მე არ ვაპირებ მათთან ერთად გირჩის კეთებას. ბევრი მიზეზის გამო, მაგრამ არა იაგოს განცხადების შინაარსის გამო. არც მიზეზებზე ვაპირებ საჯაროდ საუბარს. სამწუხაროდ, ხდება ასეთი რაღაცები ცხოვრებაში", — წერს ჯაფარიძე ფეისბუქ ჯგუფში.

როგორც ჯაფარიძემ მოგვიანებით განმარტა, გირჩი არ გაყოფილა, გაიყო მისი გზები ამ სამ თანაპარტიელთან.

მისივე თქმით, ამის მიზეზი არც იაგო ხვიჩიას განცხადება და არც პარლამენტში შესვლა-არშესვლის საკითხია. იმავეს ადასტურებენ გირჩის სხვა წევრები.

ზურაბ ჯაფარიძის განცხადების შემდეგ გირჩის თანადამფუძნებელი, გოგა ხაჩიძე პარტიის ოფისში მივიდა. მან მხარდაჭერა ჯაფარიძეს გამოუცხადა და განაცხადა, რომ გირჩი იაგო ხვიჩიამ და ვახტანგ მეგრელიშვილმა უნდა დატოვონ.

რამდენიმე დღის წინ გირჩს ერთ-ერთი ლიდერი, იაგო ხვიჩია იმ ადამიანის დაკავებას გამოეხმაურა, რომელსაც ბრალად ედება წინასწარი შეცნობით არასრულწლოვნის გამოსახულების შემცველი პორნოგრაფიის შეძენა, შენახვა, ფლობა და სარგებლობა. მან Facebook-ზე დაწერა: "პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს". სწორედ ამ პოსტს მოჰყვა მოქალაქეების, მათ შორის გირჩის მხარდამჭერების უკმაყოფილება და ხვიჩიას მიმართ კრიტიკა.

პარტიის ლიდერს ამ თემაზე განცხადება რამდენიმე დღის განმავლობაში არ გაუკეთებია. 3 დეკემბერს იაგო ხვიჩიამ განაცხადა, რომ დროა, ზურაბ ჯაფარიძემ ხმა ამოიღოს, რადგან ხვიჩიას მლანძღველების სიაში მისი მეგობრები და დამფინანსებლებიც არიან. ამის შემდეგ ჯაფარიძემ განაცხადა, რომ მისი აზრით, ხვიჩიას განცხადება ბავშვთა პორნოგრაფიის საქმეზე არასწორი იყო, თუმცა არა შინაარსის, არამედ სხვა ფაქტორების გამო. თუმცა მას არ დაუზუსტებია, რას გულისხმობს სხვა ფაქტორებში. მანვე განმარტა, მისი აზრით, რა შემთხვევაში უნდა დაისაჯოს ადამიანი ბავშვთა პორნოგრაფიის ყურებისთვის და ამის რამდენიმე მაგალითი ჩამოთვალა.

გირჩის ერთ-ერთმა წევრმა, ალექსანდრე რაქვიაშვილმა განაცხადა, რომ ზურაბ ჯაფარიძემ მათ გარკვეული ულტიმატუმები წაუყენა, რაც პარტიის მართვისგან ჩამოცილებას და განცხადებებზე "გარკვეულ ცენზურას" ეხებოდა.