Trace International-ის ბიზნესში კორუფციის რისკის შესახებ ახალი მონაცემების მიხედვით, საქართველო 194 ქვეყანას შორის 28-ე ადგილზეა. ბიზნესის კორუფციის რისკში საქართველოს 25 ქულა აქვს.

ინფორმაციის თავისუფლების განვითარების ინსტიტუტში (IDFI) აცხადებენ, რომ 2019 წლის მონაცემებით, 200 ქვეყანას შორის საქართველო 27-ე ადგილს იკავებდა 26 ქულით, რაც 2018 წლის მაჩვენებლების იდენტურია და 2017 წლის მონაცემებთან შედარებით გაუარესებულია, როცა საქართველო 200 ქვეყანას შორის 25-ე ადგილს 23 ქულით იკავებდა.

IDFI-ს თანახმად, ამ მონაცემებიდან ჩანს, ბოლო წლების განმავლობაში ბიზნესის კორუფციის რისკი ეტაპობრივად იმატებს.

"მართალია, ბოლო წელს აღნიშნული რისკი ერთი ქულით შემცირდა, მაგრამ საერთაშორისო რეიტინგში საქართველომ მაინც ერთი ადგილით უკან გადაინაცვლა", — აცხადებენ არასამთავრობო ორგანიზაციაში.

Trace International-ის ბიზნესის კორუფციის რისკის ინდექსის მიხედვით ყველაზე დაბალი კორუფციული რისკის ქვეყნებია:

  • დანია;
  • ნორვეგია;
  • ფინეთი;
  • შვედეთი;
  • ახალი ზელანდია;
  • ნიდერლანდები;
  • შვეიცარია;
  • გერმანია;
  • გაერთიანებული სამეფო;
  • ისლანდია.

რაც შეეხება საქართველოს მეზობელ ქვეყნებსა და აღმოსავლეთ ევროპის რეგიონს, საუკეთესო ქულა ჩეხეთის რესპუბლიკამ მიიღო და დაიკავა 38-ე ადგილი, ყველაზე მაღალი რისკი კი აზერბაიჯანში დაფიქსირდა და ის საერთაშორისო რეიტინგში 136-ე ადგილს იკავებს.

Trace International-მა ბიზნესში კორუფციის რისკის შესახებ ახალი მაჩვენებლები 19 ნოემბერს გამოაქვეყნა.