ინგლისელი მომღერალი, ჰარი სტაილსი გასულ თვეში პირველი კაცი გახდა, რომელიც Vogue-ის გარეკანზე მარტო გამოჩნდა. სტაილსმა გამოცემის ფოტოსესიაზე რამდენიმე კაბა მოირგო, რამაც ინტერნეტსივრცეში დიდი და არაერთგვაროვანი გამოხმაურება გამოიწვია.

ექსტრავაგანტური ფოტოები ამერიკელი კონსერვატორი აქტივისტისა და ავტორის, ქენდის ოუენსის, ყურადღების ცენტრშიც მოექცა, რომელმაც ემოციური განცხადების გაკეთება გადაწყვიტა და ტვიტერზე დაწერა: "დააბრუნეთ კაცური კაცები".

"არ არსებობს საზოგადოება, რომელსაც ძლიერი კაცების გარეშე შეუძლია გადარჩენა", — წერს ოუენსი, — "აღმოსავლეთში ეს იციან. დასავლეთში კი ჩვენი კაცების გამუდმებული ფემინიზაცია და ბავშვებისთვის მარქსიზმის სწავლება დამთხვევა ნამდვილად არაა. ეს არის პირდაპირი თავდასხმა. დააბრუნეთ კაცური კაცები".

სტაილსის ამ კიბერთავდასხმისგან დასაცავად ცნობილი ადამიანები და მომღერლის გულშემატკივრები გაერთიანდნენ.

"ჰარი სტაილსი სავსებით კაცურია", — წერს ტვიტერზე ბრიტანელი მსახიობი და აქტივისტი, ჯამილა ჯამილი, — "რადგან კაცურობა ის არის, რაც გინდა და არა ის, რაც ჩამოუყალიბებელმა, ტოქსიკურმა, ქალთმოძულე, ჰომოფობმა ს*რებმა გადაწყვიტეს 100 წლის წინ. ჰარი 104 პროცენტით სრულყოფილია".

ინტერნეტსივრცეში საკუთარი შემოგორებული განხეთქილების ვაშლი არც სტაილსს დარჩენია ყურადღების მიღმა. მომღერალმა ინსტაგრამზე ფოტო განათავსა, რომელზეც თავადაა გამოსახული ბანანით ხელში. "დააბრუნეთ კაცური კაცები", — წერია ფოტოს აღწერაში.

სურათი ერთ-ერთია Variety-ის ფოტოსესიიდან, სადაც ჰარიმ ასევე განაცხადა: "როცა რაღაცის ჩაცმაზე უარს მხოლოდ იმის გამო ამბობ, რომ ქალისაა, ამ დროს მთელ მსოფლიოს შესანიშნავი სამოსი უნდა წარუდგინო. და, ვფიქრობ, დღევანდელობაში შესანიშნავი ისაა, რომ ნებისმიერი რამის ჩაცმა შეგიძლია, რაც გაგიხარდება. აზრი არ აქვს, X არის თუ Y, რადგან მათ შორის ზღვარი ნელ-ნელა უფრო და უფრო გაურკვეველი ხდება".