ლიეტუვის საგარეო საქმეთა მინისტრი, ლინას ლინკევიჩუსი აცხადებს, რომ მნიშვნელოვანია ნატოს კარი საქართველოსა და უკრაინისთვის იყოს ღია და მოხდეს თანამშრომლობის გაღრმავება. ამის შესახებ მან ტვიტერზე დაწერა.

"ნატოს საგარეო საქმეთა მინისტრებმა განიხილეს შავი ზღვის რეგიონის უსაფრთხოების საკითხი უკრაინასა და საქართველოსთან ერთად. რადგან რუსეთი განაგრძობს აგრესიულ პოლიტიკას, მნიშვნელოვანია უკრაინასა და საქართველოსთან თანამშრომლობის გაძლიერება და ნატოს კარის ღიად შენარჩუნება", — წერს ის.

ნატოს წევრი ქვეყნების საგარეო საქმეთა მინისტრების ვიდეოკონფერენცია 1-2 დეკემბერს გაიმართა.

ნატოს გენერალურის მდივნის, იენს სტოლტენბერგის განცხადებით, შავი ზღვის რეგიონს ნატოსა და ნატოს ყველა მოკავშირისთვის სტრატეგიული მნიშვნელობა აქვს. მისი თქმით, ისინი მჭიდროდ თანამშრომლობენ პარტნიორ საქართველოსა და უკრაინასთან. ნატოს 3 წევრი ქვეყანა — თურქეთი, ბულგარეთი და რუმინეთი შავი ზღვის სანაპირო ქვეყნებია. ასე რომ, სტოლტენბერგის თქმით, ნატო შავი ზღვის რეგიონში ძალებს ინარჩუნებს.

"როგორც პარტნიორები, მჭიდროდ ვთანამშრომლობთ უკრაინასა და საქართველოსთან, რადგან ვხედავთ, რომ ყირიმის უკანონო ანექსიითა და საქართველოს ნაწილებში რუსი სამხედროების განთავსებით, რუსეთი ამ ქვეყნების სუვერენიტეტისა და ტერიტორიული მთლიანობის დარღვევას აგრძელებს", — აცხადებს სტოლტენბერგი.