ქართული ოცნების წევრი, შალვა პაპუაშვილი ოპოზიციას ურჩევს, დაივიწყონ თავმოყვარეობა და ისე მიიღონ გადაწყვეტილება პარლამენტში შესვლის შესახებ. საზოგადოებრივი მაუწყებლის ეთერში პაპუაშვილმა განაცხადა, რომ დიალოგი მმართველ პარტიასა და ოპოზიციას შორის უკვე იმ ფაზაშია, როცა ამ გადაწყვეტილების მიღება შესაძლებელია, თუ მხარეები პასუხისმგებლიანად მოეკიდებიან საკითხს.

"ეს დიალოგი არის იმ ფაზაში, რომ მომწიფებული არის გადაწყვეტილების მიღებისთვის და საჭიროა ახლა, რომ ყველა მხარე პასუხისმგებლობით მოეკიდოს ამ ყველაფერს. მათ შორის, დაივიწყონ, სავარაუდოდ, თავმოყვარეობის საკითხები, რომელზეც შეიძლება ფიქრობდნენ. იმასთან დაკავშირებით, რომ რახან თქვეს ერთხელ რომ არ შევალთ და ამის გადათქმა უჭირთ. იფიქრონ საკუთარ მოსახლეობაზე, იფიქრონ იმ სიტუაციაზე, პანდემიის კუთხით რაც არსებობს ქვეყანაში და ის, რომ საჭირო არის ამ დროს იყოს ფუნქციონირებადი პარლამენტი და ამ პასუხისმგებლობით და ამ გადმოსახედიდან მიიღონ გადაწყვეტილება.

მოსაზრებები უკვე გაცვლილი არის საკმარისად დიალოგის მაგიდაზე და ახლა საჭირო არის, რომ ყველა პოლიტიკოსმა პასუხისმგებლიანი გადაწყვეტილება მიიღოს", — განაცხადა შალვა პაპუაშვილმა.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე, რომელიც 21 ნოემბერს ჩატარდა, და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი და ოპოზიცურ პარტიებს შორის მოლაპარაკებები მიმდინარეობს. უკვე გაიმართა მოლაპარაკებების ორი რაუნდი. ოპოზიცია ამბობს, რომ ქართულ ოცნებას წარუდგინეს კონკრეტული წინადადება და შემდეგ ნაბიჯს სწორედ მმართველი პარტიისგან ელიან.

გაიგეთ მეტი: