უნგრეთის მმართველი პარტიის წევრმა პოლიტიკოსმა, რომელმაც ევროპარლამენტარის თანამდებობა რამდენიმე დღის წინ დატოვა, განაცხადა, რომ იგი ბრიუსელში მდებარე იმ სახლში იმყოფებოდა წვეულებაზე, სადაც კარანტინის წესების დარღვევის გამო პოლიცია შეიჭრა.

იოჟეფ საიერმა, რომელიც პრემიერმინისტრ ვიქტორ ორბანის ულტრამემარჯვენე პარტიის ერთ-ერთი მთავარი წევრია, პირველ დეკემბერს გამოქვეყნებულ განცხადებაში აღნიშნა, რომ მან პოლიციასთან ითანამშრომლა.

განცხადებაში მოხსენიებული წვეულება 27 ნოემბერს იმართებოდა ბრიუსელის ერთ-ერთ შენობაში, სადაც გეი ბარია განთავსებული. ბელგიური მედიაგამოცემების ცნობით, ეს იყო დახურული "სექს-წვეულება", რომელშიც მხოლოდ კაცები, მათ შორის დიპლომატები და ევროპარლამენტარები, მონაწილეობდნენ.

"ვესწრებოდი", — ლაკონიურად აღნიშნავს საიერი განცხადებაში და არ ახსენებს"სექს-წვეულებას".

ასევე პირველ დეკემბერს გამოქვეყნებულ პოლიციის განცხადებაში ნათქვამია, რომ გამვლელმა კაცი შენიშნა, რომელიც "საწვიმარი მილის გასწვრივ გარბოდა", ხელები კი სისხლიანი ჰქონდა. განცხადების მიხედვით, კაცი, რომელიც, როგორც აღმოჩნდა, საიერი ყოფილა, სავარაუდოდ, გაქცევისას დაშავდა. ასევე აღნიშნულია, რომ "მის ზურგჩანთაში ნარკოტიკული საშუალებები აღმოაჩინეს", მოგვიანებით კი, სახლში მიყვანისას მისი იდენტიფიცირება დიპლომატიური პასპორტით მოხდა.

უნგრულ მედიაში გავრცელებული პოლიტიკოსის განცხადება მიუთითებს, რომ 59 წლის საიერმა პოლიციისგან სიტყვიერი გაფრთხილება მიიღო სახლში მიყვანისას. იგი ასევე დასძენს, რომ ნარკოტიკული საშუალებები არ გამოუყენებია, ზურგჩანთაში პოლიციის ნაპოვნ ექსტაზზე კი ამბობს, რომ "არაფერი იცოდა".

საიერის თქმით, იგი შეკრებების შეზღუდვის დარღვევას ნანობს. იგი "არასწორ ნაბიჯს" "უკიდურესად პიროვნულად" აფასებს და იმედოვნებს, რომ იგი არ აისახება წლების განმავლობაში სამშობლოსადმი გაწეული მისი სამსახურის რეპუტაციაზე.

"ჩემგან უპასუხისმგებლო საქციელი იყო", — ამბობს იგი და აღნიშნავს, რომ ნებისმიერი სამართლებრივი რეაგირების მისაღებად მზადაა. ამასთან, მას თანამდებობის დატოვებაც მოუწია, მიზეზად კი ყოველდღიური პოლიტიკით მიღებულ "უდიდეს ემოციურ წნეხს" ასახელებს.

საიერი ევროპარლამენტარის თანამდებობას უნგრეთის ევროკავშირში შესვლის შემდეგ იკავებს. იგი ევროპის სახალხო პარტიის დეპუტატი იყო 2019 წლამდე.

უნგრეთში მმართველი ფიდესის პარტია კი "კონსერვატიულ-ქრისტიანულ" ღირებულებებზე დაფუძნებული კანონპროექტების შექმნას განაგრძობს. წლეულს, მთავრობის მოთხოვნით, ქვეყანაში მცხოვრებ ტრანსგენდერ ადამიანებს დაბადებისას განსაზღვრული სქესის საპირისპიროს დოკუმენტებში მითითება აეკრძალათ, ცოტა ხნის წინ კი იგივე პარტიამ მოითხოვა ერთი და იმავე სქესის მქონე წყვილების მიერ შვილის აყვანის აკრძალვა.

ყველაფერ ამისდა მიუხედავად, საიერმა, რომელიც ქორწინებას ქალის და კაცის კავშირად მიიჩნევს, განაცხადა, რომ კვლავ რჩება ორბანის პოლიტიკის მხარდამჭერი.