საპარლამენტო უმრავლესობის ლიდერმა მანანა კობახიძემ საკონსტიტუციო სასამართლოს მოსამართლის კანდიდატურაზე წარდგენის შემდეგ ჟურნალისტებთან კომენტარი გააკეთა. მისი განცხადებით, დეპუტატობის გამოცდილების მიუხედავად, იგი საქმეში მიუკერძოებელი იქნება:

"ოთხწლიანი გამოცდილება და ცოტა მეტი, როგორც კანონმდებლის მხოლოდ და მხოლოდ დამეხმარება იმაში, რომ ობიექტურად და ყოველმხრივ შევაფასო ესა თუ ის კანონი. შეიძლება კანონზე იყოს ხელმოწერა და შეიძლება იყოს ჩემი ინიცირებულიც, მაგრამ ეს არ ნიშნავს იმას, რომ მე კონკრეტულ საქმეში ვიქნები მიკერძოებული, ამ შემთხვევაში, რომელიმე მხარის მიმართ. აუცილებლად გადაწყვეტილებები გამოვა მხოლოდ და მხოლოდ საქმეში არსებული გარემოებების შესწავლით".

ფრაქცია ქართულმა ოცნებამ საკონსტიტუციო სასამართლოს მოსამართლის პოსტზე მანანა კობახიძის კანდიდატურა წარადგინა. განცხადება ამის შესახებ დღეს, ფრაქცია ქართული ოცნების თავმჯდომარემ, მამუკა მდინარაძემ გააკეთა.

გადაწყვეტილებას დღეს, 18 საათზე ბიუროს სხდომაზე განიხილავენ, სადაც ოფიციალურად გადაწყდება დაიკავებს, თუ არა კობახიძე მოსამართლის პოსტს 10 წლის ვადით.