სირიის საკითხებზე მოლაპარაკებების დაწყებამდე, რუსეთის, ირანისა და თურქეთის დელეგაციების სამმხრივი შეხვედრა ასტანაში დასრულდა. ის 5 ნახევარი საათი გაგრძელდა. ინფორმაციას ამის შესახებ რუსული საინფორმაციო სააგენტო RIA ავრცელებს.

სააგენტოს ცნობით, შეხვედრაში თითოეული ქვეყნიდან 3 ადამიანი მონაწილეობდა და კონსულტაციები დახურულ კარს მიღმა გაიმართა.

რუსეთის პრეზიდენტის სპეციალურმა წარმომადგენელმა სირიის საკითხებში ალექსანდრ ლავრენტიევმა განაცხადა, რომ მოლაპარაკებების შედეგად ირანულ და თურქულ მხარესთან ბევრი პოზიციის შეჯერება მოხდა. მისივე თქმით, სირიასთან დაკავშირებული მოლაპარაკებების ფორმატი, რომელიც ხვალ დაიწყება, სრულიად ნათელი არ არის და განხილვის სტადიაშია.

საერთაშორისო შეხვედრა სირიის საკითხების დარეგულირებასთან დაკავშირებით 23 იანვარს დაიწყება და სავარაუდოდ, 2 დღე გაგრძელდება. ყაზახეთის დედაქალაქში უკვე ჩავიდნენ დელეგაციები რუსეთიდან, თურქეთიდან და ირანიდან, ასევე გაეროს სპეციალური წარმომადგენელი სტაფან დე მისტურა. მოლაპარაკებები, სავარაუდოდ, დახურულ კარს მიღმა გაიმართება.