რუსეთის იუსტიციის სამინისტრომ უკრაინელი მფრინავის, ნადეჟდა სავჩენკოს სამშობლოში დაბრუნების შესახებ დოკუმენტები სასჯელაღსრულების ფედერალური სამსახურისგან უკვე მიიღო, თუმცა როგორც მისი ადვოკატი აღნიშნავს, სავჩენკოს უკრაინისთვის გადაცემის პროცედურას შეიძლება ნახევარი წელი დასჭირდეს. რაც შეეხება უკრაინაში გასამართლებულ რუს სამხედროებს, მათ რუსეთს მას შემდეგ გადასცემენ, რაც ისინი ამაზე თანხმობას განაცხადებენ. ამის შესახებ ინფორმაციას Ukrinform ავრცელებს.

• სავჩენკოს ადვოკატი: უკრაინა არ არის ვალდებული სავჩენკოს განაჩენი აღასრულოს
• სავჩენკოს უკრაინის მხარისთვის გადაცემის პროცესი დაწყებულია
• პუტინი და პოროშენკო სავჩენკოს უკრაინაში დაბრუნებაზე შეთანხმდნენ
• უკრაინის პრეზიდენტი რუსეთს სავჩენკოს გათავისუფლების სანაცვლოდ სამხედრო ტყვეს სთავაზობს
• უკრაინაში დაკავებულ რუს სამხედროებს 14 წლიანი პატიმრობა მიუსაჯეს

თუ რა ბედი ეწევა ნადეჟა სავჩენკოს მას შემდეგ, რაც რუსეთი მას უკრაინას გადასცემს, ამის შესახებ ჟურნალისტების შეკითხვებს მისი ადვოკატები, ნიკოლაი პოლოზოვი და მარკ ფეიგინი პასუხობენ.

ნიკოლაი პოლოზოვმა განმარტა, რომ 1993 წელს მსჯავრდებულების გადაცემასთან დაკავშირებით მიღებული კონვენციის თანახმად, უკრაინამ სავჩენკოს განაჩენი უნდა აღიაროს და სასჯელის აღსრულების გარანტია უნდა გასცეს. თუმცა, მისი თქმით, მას შემდეგ, რაც სავჩენკო რუსეთ-უკრაინის საზღვარს გადაკვეთს, უკრაინას უფლება არ ექნება სავჩენკო პატიმრობაში ჰყავდეს, რადგან ის მის, როგორც ევროპის საბჭოს საპარლამენტო ასამბლეის დელეგატის იმუნიტეტს, აღიარებს (რუსეთი ერთადერთი ქვეყანაა, რომელიც ამ იმუნიტეტს არ ცნობს, Ukrinform).

მისი თქმით, სავჩენკოს უკრაინისთვის გადაცემის პროცესის პოტენციური საფრთხე მხოლოდ მის ხანგრძლივობაშია. პოლოზოვის განმარტებით, პროცედურების რომელიმე ეტაპზე დროში გაწელვის შემთხვევაში, სავჩენკო შიმშილობის გამოცხადების უფლებას იტოვებს იმისთვის, რომ როგორც რუსი, ისე უკრაინელი ჩინოვნიკების მუშაობა დააჩქაროს:

"დაცვის მხარე ასეთი სცენარის განვითარების წინააღმდეგია. თუმცა, სავჩენკო გადაწყვეტილებებს დამოუკიდებლად იღებს. სიტუაციაზე ზემოქმედების ეს ერთადერთი გზა მის პირობებში შედის".

აღნიშნულთან დაკავშირებით Kommersant-ის ჟურნალისტი სავჩენკოს მეორე ადვოკატს, მარკ ფეიგინსაც ესაუბრა და შეახსენა, რომ რუსეთი სავჩენკოს გაცვლაზე მხოლოდ იმ შემთხვევაში თანხმდებოდა, თუ უკრაინელი მფრინავი სამშობლოში დაბრუნების შემდეგ სასჯელს მოიხდიდა, რაზეც ფეიგინმა უპასუხა:

"განა არ იცის რუსეთმა, რომ სავჩენკო დეპუტატი, ევროპის საბჭოს საპარლამენტო ასამბლეის დელეგატი და უკრაინის გმირია? თუ წარმოგიდგენიათ ასეთი ადამიანის მიერ სასჯელის მოხდა? მითუმეტეს, რომ როგორც დაცვის მხარე, ასევე ყველა უკრაინაში დარწმუნებულია, რომ ის უდანაშაულოა, რაზეც მეტყველებს სასამართლოზე წარდგენილი მტკიცებულებებიც. თუმცა, გადაწყვეტილება არის ისეთი, როგორიც არის. ამიტომ, უკრაინა, ასეთ გარანტიებს სუფთა ნამუსით იძლევა, ხოლო რა მოხდება შემდეგ, ეს პროცესუალური საკითხია".

ფეიგინის განმარტებით, მიუხედავად იმისა, რომ უკრაინა იძლევა იმის გარანტიას, რომ სამშობლოში სავჩენკო სასჯელს მოიხდის, ეს გადაწყვეტილება შეიძლება გასაჩივრდეს თუნდაც იმიტომ, რომ სავჩენკოს ზემოაღნიშნული ევროპის საბჭოს საპარლამენტო ასამბლეის დელეგატის იმუნიტეტი აქვს.

გარდა ამისა, მისი თქმით, უკრაინის პრეზიდენტს, პეტრო პოროშენკოს, სავჩენკოს როგორც ამნისტირება, ისე შეწყალება შეუძლია, რაც სავსებით კანონიერი ქმედება იქნება და ამის შესახებ რუსეთს არ შეიძლება პრეტენზიები ჰქონდეს.

რუსულმა მხარემ ნადეჟდა სავჩენკო 2014 წელს წელს დააკავა და ბრალად რუსი ჟურნალისტების, იგორ კორნელიუკისა და ანტონ ვოლოსინის, მკვლელობა დასდო. ამ დროის განმავლობაში სავჩენკო ბრალდებას უარყოფს და ამტკიცებს, რომ მის ირგვლივ განვითარებული პროცესებს პოლიტიკური სარჩული აქვს. მისი განმარტებით, 2014 წლის ივნისში აღმოსავლეთ უკრაინაში მას შემდეგ შეიპყრეს, რაც რუსი ჟურნალისტები უკვე დახოცილები იყვნენ.

რუსულმა მხარემ სავჩენკო დამნაშავედ ცნო და 22 წლიანი პატიმრობა მიუსაჯა.