ძაღლები ადამიანების ცხოვრებაში უძველესი დროიდან არიან. ზოგიერთი კვლევის მიხედვით, ოთხფეხა და ბეწვიანი მეგობრები ჩვენ გვერდით უკვე 10 ათას წელზე მეტხანს ცხოვრობენ. ამაზე მეტყველებს 1976 წელს, ისრაელში გაკეთებული აღმოჩენა, როცა არქეოლოგმა საიმონ დევისმა 12 000 წლის წინანდელი ადამიანის სამარხი იპოვა, რომელსაც ხელში ძაღლის ჩონჩხი ეკავა.

ძაღლები მძიმე პერიოდშიც არ გვტოვებენ — მეტიც ჩვენს გამხნევას მთელი მონდომებით ცდილობენ ხოლმე. ერთ-ერთი მათგანია შაილო — ოქროსფერი რეტრივერი, რომელიც სულ ახლახან ოჰაიოს სახელმწიფო უნივერსიტეტის სამედიცინო ცენტრის თანამშრომელი გახდა.

ახალი ამბავი საავადმყოფოს ექიმმა, შერი დანავეიმ, ტვიტერზე გააზიარა და საზეიმოდ გამოაცხადა, რომ თავისი სამსახურის გუნდს ახალი წევრი შეემატა, რომლის ერთადერთი მოვალეობა აქეთ-იქით სიარული და პაციენტებისა და სამედიცინო პერსონალის მისალმებაა.

ახალმა თანამშრომელმა საკუთარი "საპასპორტე ფოტოთი" ბეიჯიც მიიღო, სადაც დაკავებული თანამდებობაცაა აღნიშნული.

შაილო საავადმყოფოში დასაქმებული ერთადერთი ცუგა როდია. არაერთი სამედიცინო ცენტრი ძაღლებს კარს უღებს, რათა მათ ასეთ სტრესულ სიტუაციაში, მოწყენილ პალატებში სიხალისე შეიტანონ და პაციენტები ანუგეშონ. ეს მიდგომა უსაფუძვლო არაა — კვლევები მიუთითებს, რომ ძაღლები ადამიანების ფსიქოლოგიურ მდგომარეობაზე პოზიტიურ გავლენას ახდენენ, ამცირებენ სტრესს, შფოთვას და მარტოობის განცდას. ეს ალბათ ერთ-ერთი მიზეზია, რატომ მიაჩნია ძაღლის პატრონების უმეტესობას ოთხფეხა მეგობარი ოჯახის სრულფასოვან წევრად.

შაილოს ამბავმა დიდად გაახარა ინტერნეტმომხმარებლები. ისინი სხვა საავადმყოფოებს მეტი ოთხფეხა თანამშრომლის აყვანისაკენ, შაილოს სამსახურს კი მისთვის ხელფასის მომატებისკენ მოუწოდებენ.