პრორუსული პარტიის, პატრიოტთა ალიანსის ლიდერის ირმა ინაშვილის თქმით, თუ ოპოზიცია და ხელისუფლება მკაფიოდ არ შეთანხმდა ახალ არჩევნებზე, ის ჟურნალისტიკაში დაბრუნდება და იქიდან გააგრძელებს ბრძოლას. მან ამის შესახებ აშშ-ის ელჩთან შეხვედრის შემდეგ განაცხადა.

“ჩვენი პარტია და მე არ ვაპირებთ პარლამენტში შესვლას. უნდა შედგეს 8 მარტის ტიპის მემორანდუმი. მე პარლამენტში შევედი ქუჩიდან, ქუჩის საპროტესტო აქციები, ძალიან დიდი ბრძოლა, როგორც ჟურნალისტმა, თქვენმა კოლეგამ, გავიარე, თუ მკაფიო შეთანხმება არ შედგება, სადაც მკაფიოდვე ჩაიწერება, რომ ახალი არჩევნები ინიშნება, ისევ აღმოვჩნდები თქვენ რიგებში და იქიდან დავიწყებ ბრძოლას სისტემის წინააღმდეგ”, — განაცხადა ინაშვილმა.

დღეს ოპოზიციური პარტიები აშშ-ის ელჩს კიდევ ერთხელ ინდივიდუალურად შეხვდნენ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. მათ ბოიკოტი გამოუცხადეს არჩევნების მეორე ტურსაც, რომელიც 17 მაჟორიტარულ ოლქში შედგა. ოპოზიცია ითხოვს ხელახალი საპარლამენტო არჩევნების ჩატარებას ახალი საარჩევნო ადმინისტრაციის პირობებში.

აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტია მიუღებელი.