პრეზიდენტ ილჰამ ალიევის განცხადებით, ქალბაჯატრის რაიონს ახლა უკვე აზერბაიჯანი აკონტროლებს. ინფორმაციას ამის შესახებ რუსული სახელისუფლებო გამოცემა TASS ავრცელებს.

"დღეს ქალბაჯარის რეგიონი გათავისუფლდა ოკუპაციისგან. გულითადად ვულოცავ მთელ მოსახლეობას", — განაცხადა ალიევმა სატელევიზიო მიმართვისას.

მისი თქმით, ქალბაჯარი აზერბაიჯანის ერთ-ერთ მსხვილი რეგიონია და იქ არსებული მეჩეთები და ეკლესიები მათთვის ისტორიულად მნიშვნელოვანია.

"ნურავინ იღელვებს, ამ ეკლესიებს სახელმწიფო მომავალშიც დაიცავს", — აღნიშნა ალიევმა.

როგორც ალიევი ამბობს, რეგიონს აღადგენენ, მათ შორის ნახიჩევანის ავტონომიურ რესპუბლიკასთან მოეწყობა სარკინიგზო გზა.

ქალბაჯარის რეგიონი აზერბაიჯანს 10 ნოემბრის შეთანხმების საფუძველზე გადაეცა. დოკუმენტი ბაქოსთვის აღდამისა და ლაჩინის რეგიონების დაბრუნებასაც ითვალისწინებს.

ლაჩინის რეგიონში 5 კილომეტრი სიგანის დერეფანი უკვე შეიქმნა. დერეფანი მთიან ყარაბაღსა და სომხეთს აკავშირებს ერთმანეთთან, არ ეხება ქალაქ შუშას (შუშის) და რუსეთის სამშვიდობოების კონტროლის ქვეშ იქნება.

რუსეთის სამშვიდობო მისია ლაჩინის რეგიონში ხუთი წლით დარჩება და მათი იქ ყოფნის ვადა ავტომატურად გაგრძელდება, თუ ვადის ამოწურვამდე ექვსი თვით ადრე რომელიმე მხარე აღნიშნული რეჟიმის გაუქმებას არ მოინდომებს.

მთიან ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან, თუმცა რუსეთი ამას უარყოფს. ალიევმა შეთანხმებას ისტორიული უწოდა და თქვა, რომ ეს სომხეთის კაპიტულაციას ნიშნავს.

ნიკოლ ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს. მთიან ყარაბაღში სამხედრო დაპირისპირება 27 სექტემბერს განახლდა.

ამავე თემაზე: