დაავადებათა კონტროლის ცენტრის დირექტორმა, ამირან გამყრელიძემ საკოორდინაციო საბჭოს სხდომის დასრულების შემდეგ გამართულ ბრიფინგზე განმარტა, თუ რამ გამოიწვია ინფიცირების შემთხვევების ზრდა საქართველოში.

მიზეზებად გამყრელიძემ ზაფხულში მობილობის ზრდას, წინასაარჩვნო კამპანიას, საარჩევნო პროცესს და ხალხის მიერ გამართულ შეკრებებს, ლხინის სუფრებს ასახელებს.

"განაპირობა, პირველ რიგში, მობილობის სერიოზულმა გაზრდამ ზაფხულში, განსაკუთრებით აგვისტოში და არ დავმალავ, გეტყვით პირდაპირ — განსაკუთრებით აჭარაში, წესების და რეგულაციების, სამწუხაროდ, არდაცვამ და არგაკონტროლებამ და, რა თქმა უნდა, სექტემბერში და შემდგომ სერიოზული როლი ითამაშა, ჩვენ ვეძახით ე.წ. ბუსტერი როლს ამას, დიდმა მობილობამ, რაც დაკავშირებული იყო ჯერ წინასაარჩევნო კამპანიასთან. არ ვიცი გახსოვთ თუ არა, იგივე ამ მიკროფონებით ხშირად გამიჟღერებია და პოლიტიკოსებისთვის მომიწოდებია, რომ იყავით წინასაარჩევნო პერიოდში ნიღბით, ძირითადად ჩაატარეთ წინასაარჩევნო კამპანია გარე სივრცეებში, არა შიგნით, არა დახურულში. გარე სივრცეებში მაშინ ჯერ არ იყო დადგენილი ნიღბის ტარება და ვთხოვდით, რომ ატარეთ ნიღაბი, დაიცავით დისტანცია, ნუ ჩავეხუტებით ერთმანეთს, ნუ გადავკოცნით ერთმანეთს და ა.შ", — განაცხადა გამყრელიძემ.

მისი თქმით, არჩევნების დღეს ეპიდსაწინააღმდეგო ღონისძიებები დაცული იყო, მაგრამ რიგებმა და შემდგომ შეკრებებმა მაინც გამოიწვია ინფიცირების გზარდა.

"წინასაარჩევნო კამპანიამ ითამაშა სერიოზული როლი მობილობის გაზრდაში, შემდეგ, რა თქმა უნდა არჩევნების დღემ, როცა 2 მლნ ადამიანი, თუ რამდენიც გამოვიდა დაახლოებით არჩევნების პროცესში, რა თქმა უნდა, იქ საარჩევნო უბნებზე დაცული იყო ეპიდსაწინააღმდეგო ღონისძიებები, მაგრამ იყო რიგები, იყო შემდგომ შეკრებები და ა.შ. კიდევ იმან, რაც ჩვენ არ დავიცავით, მთავარი — ვერ გადავეჩვიეთ მაინც დიდ შეკრებებს დიდ ლხინის სუფრებს..", — განაცხადა დაავადებათა კონტროლის ცენტრის დირექტორმა.

24 ნოემბერს საქართველოში კორონავირუსის 3 128 ახალი შემთხვევა დადასტურდა, გამოჯანმრთელდა — 3 045, გარდაიცვალა — 39. ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 111 818-ს. ჯამში გამოჯანმრთელებულთია 92 215 ადამიანი, გარდაიცვალა 1 051.

ეპიდემიოლოგები და სამთავრობო გუნდის წევრები ამბობდნენ, რომ ვირუსის პრევენციისთვის შეზღუდვები აუცილებელია, თუმცა სრული "ლოქდაუნი" ქვეყნის ეკონომიკას დააზარალებს, ამიტომ ეტაპობრივად, წერტილოვანი შეზღუდვები დაწესდება.