ინფექციური საავადმყოფოს დირექტორის, თენგიზ ცერცვაძის განცხადებით, ქვეყანა უდიდესი გამოწვევების წინაშეა და სალომე ზურაბიშვილის, როგორც პრეზიდენტის და პიროვნების ფაქტორი მათ დაძლევაში მნიშვნელოვანია.

"მინდა დაგიდასტუროთ ჩემი უდიდესი პატივისცემა და სრული მხარდაჭერა თქვენს უაღრესად საპასუხისმგებლო საქმიანობაში საქართველოს სახელმწიფოს და ქართველი ხალხის საკეთილდღეოდ. დღეს ჩვენი ქვეყანა დგას უდიდესი გამოწვევების (მათ შორის პანდემიის) წინაშე და თქვენი, როგორც პრეზიდენტის და პიროვნების ფაქტორი ამ გამოწვევების წარმატებით დაძლევაში მნიშვნელოვანია", — წერს ცერცვაძე და მადლობას უხდის ზურაბიშვილის იმისთვის, რომ მისი ჯანმრთელობის მდგომარეობით დაინტერესებულია.

ინფექციური საავადმყოფოს დირექტორსა და კლინიკური ჯგუფის ხელმძღვანელს, თენგიზ ცერცვაძესა და მის ცოლს, ანა თოფურიას კორონავირუსი დაუდასტურდათ. როგორც კლინიკაში ამბობენ, მათი ჯანმრთელობა დამაკმაყოფილებელია და სახლში მკურნალობენ.

საქართველოს პრეზიდენტმა, სალომე ზურაბიშვილმა ინფექციური საავადმყოფოს დირექტორს, თენგიზ ცერცვაძეს მალე გამოჯანმრთელება უსურვა და ბოდიში მოუხადა იმ ხალხის ნაცვლად, ვინს მას აკრიტიკებდა.

ზურაბიშვილის თქმით, საზოგადოების უდიდესი ნაწილი ცერცვაძის მადლიერია და მისთვის ლოცულობენ.

"მინდა, პირადად ვუთხრა მადლობა მისი თავდადებისთვის, კორონასთან ათთვიანი, დღე და ღამე შეუპოვარი ბრძოლისთვის!

მინდა ბოდიში მოვუხადო მათ მაგივრად, ვინც მადლიერების ნაცვლად, ექიმების ლანძღვა და შეურაცხყოფა არჩია", — წერდა პრეზიდენტი.