"მხნედ იყავით! მალე დაუბრუნდით ამ ბრძოლას!" — საქართველოს პრეზიდენტი, სალომე ზურაბიშვილი ინფექციური საავადმყოფოს დირექტორს, თენგიზ ცერცვაძეს მალე გამოჯანმრთელებას უსურვებს და ბოდიშს უხდის იმ ხალხის ნაცვლად, ვინს მას აკრიტიკებდა.

ზურაბიშვილის თქმით, საზოგადოების უდიდესი ნაწილი ცერცვაძის მადლიერია და მისთვის ლოცულობენ.

"მინდა, პირადად ვუთხრა მადლობა მისი თავდადებისთვის, კორონასთან ათთვიანი, დღე და ღამე შეუპოვარი ბრძოლისთვის!

მინდა ბოდიში მოვუხადო მათ მაგივრად, ვინც მადლიერების ნაცვლად, ექიმების ლანძღვა და შეურაცხყოფა არჩია", — წერს ის.

ინფექციური საავადმყოფოს დირექტორსა და კლინიკური ჯგუფის ხელმძღვანელს, თენგიზ ცერცვაძესა და მის ცოლს, ანა თოფურიას კორონავირუსი დაუდასტურდათ. როგორც კლინიკაში ამბობენ, მათი ჯანმრთელობა დამაკმაყოფილებელია და სახლში მკურნალობენ.

პანდემიის დაწყების დღიდან თენგიზ ცერცვაძე კორონავირუსის მართვის პროცესში ჩაერთო, როგორც კლინიკური ჯგუფის ხელმძღვანელი. სწორედ მისი ხელმძღვანელობით დგინდება და განისაზღვრება ვირუსის მართვისა და მკურნალობის პროტოკოლები.

საქართველოში ბოლო 24 საათის განმავლობაში გამოვლენილია ინფიცირების 3 117 ახალი შემთხვევა და გარდაიცვალა 45 ადამიანი. დღეის მონაცემებით, სულ ქვეყანაში ინფიცირებულია 85 952 ადამიანი.