ნაციონალური მოძრაობის თავმჯდომარის, გრიგოლ ვაშაძის თქმით, მიუხედავად იმისა, რომ სახელმწიფო მდივანი მაიკ პომპეო აშშ-ში წარმავალი ადმინისტრაციის წარმომადგენელია, მისი ვიზიტი ქვეყანაში ბევრს ნიშნავს.

"როგორც ჩემი 45 წლის გამოცდილება ამბობს, ადამიანები, რომლებიც ამბობენ, რომ წამსვლელი ადმინისტრაციის სახელმწიფო მდივნის ჩამოსვლა არაფერს ნიშნავს, წესით არიან რუსეთის გავლენის აგენტები", — განაცხადა გრიგოლ ვაშაძემ.

მისივე თქმით, ის რომ სახელმწიფო მდივნის წარმომადგენელი დარჩა ქვეყანაში ოპოზიციასთან შესახვედრად იმის ნიშანის, რომ სტრატეგიულ მოკავშირეს ესმის, რამდენად "ღრმა არის პოლიტიკური კრიზისი და როგორ გვჭირდება, სტრატეგიული მოკავშირეების დახმარება, რომ გამოსავალი მოვძებნოთ".

როგორც გრიგოლ ვაშაძე ამბობს, მდივნის წარმომადგენელს არჩევნების დროს დარღვევებზე ესაუბრნენ და მტკიცებულებებიც წარუდგინეს.

"[მისგან] გზავნილი იყო ის, რომ გამომდინარე იქიდან რაოდენ რთული არის ეკონომიკური მდგომარეობა, რაოდენ რთული არის სოციალური მდგომარეობა, რაოდენ რთული არის მდგომარეობა რეგიონში და რაოდენ რთულია, რომ მთელი მსოფლიო გაყინულია და ებრძვის კორონავირუსს, სასწრაფოდ საჭიროა საქართველოში კომპრომისის მონახვა", — აღნიშნა შეხვედრის შემდეგ ვაშაძემ.

პომპეო თბილისში გუშინ, 17 ნოემბერს საღამოს ჩამოფრინდა და ოფიციალური შეხვედრები დღეს დაიწყო. ის თბილისში 24 საათზე ნაკლები იყო და უკვე წავიდა.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, თუმცა მედიასთან კომენტარები არ გაუკეთებია და მხოლოდ აშშ-ის საელჩოს განცხადებები გავრცელდა. ასევე, პომპეო შეხვდა არასამთავრობო ორგანიზაციებს. ცნობილია, რომ NGO-ებთან საუბრის ძირითადი თემა სასამართლოს დამოუკიდებლობა იყო.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

გაიგეთ მეტი პომპეოს ვიზიტზე: