ევროპული საქართველოს ერთ ერთი ლიდერი, გიგი უგულავა ამბობს, რომ ქართული ოცნების მიერ შემოთავაზებულ დებატებს წინაპირობები აქვს, რომელიც უნდა შესრულდეს. ამის შესახებ მან მთავარი არხის ეთერში ისაუბრა.

"არის წინაპირობები, რომლებიც უნდა შესრულდეს, რომ ეს დებატები შედგეს, თორემ სხვა შემთხვევაში მივიღებთ ერთი ღლაპის დაანონსებულ რაღაცას. წამოწვა ახლა თავის ახლობელ ტელევიზიებში და მოინდომა ბიჭმა, მოდი, აბა გავარჩიოთ საქმეო. მაგას ხომ არ ძმარავს ცოტა?! იყოს ნეიტრალური ტერიტორია, იყოს სამეულში კობახიძე, გასაუთოვებლად მშვენიერი ობიექტია, მაგრამ რატომ? ვინ არის? ჩვეულებრივი დეპუტატია", — ამბობს უგულავა.

უგულავას თქმით, მისი მთავარი მოთხოვნაა, დებატები ყველა ტელევიზიის საშუალებით გადაიცემოდეს.

ქართული ოცნების აღმასრულებელმა მდივანმა, ირაკლი კობახიძემ ოპოზიციას სატელევიზიო დებატები გუშინ შესთავაზა. მან რუსთავი 2-ის ეთერში განაცხადა, რომ მზადაა ისეთ ფორმატში მონაწილეობისთვის, სადაც ოპოზიციას დაუპირისპირდება მმართველი გუნდი, კონკრეტული განსახილველი თემები კი იქნება საარჩევნო დარღვევები, ხარვეზები და მანიპულაცია.