ქართული ოცნების გენერალური მდივნის, კახა კალაძის განცხადებით, მმართველი პარტია ხელახალი არჩევნები საკითხს არ განიხილავს. ამის შესახებ მან სპეციალურ ბრიფინგზე განაცხადა.

"ქართული ოცნება არ განიხილავს ქართველი ხალხის მიერ თავისუფალ არჩევნებზე გამოხატული არჩევანის კითხვის ნიშნის ქვეშ დაყენებას, ხელახალ არჩევნებს ან მსგავს საკითხებს. არავის უნდა დაავიწყდეს, რომ პატივი უნდა ვცეთ ყველა ამომრჩეველს, თითოეული მათგანის არჩევანს, რომელიც გამოიხატა როგორც ოპოზიციური პარტიების, ისე ქართული ოცნების მხარდაჭერაში", — განაცხადა კალაძემ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრებოდა.

როგორც ოპოზიციის წარმომადგენლები აცხადებენ, მათი მთავარი მოთხოვნა მოლაპარაკებების დროს სწორედ ხელახალი არჩევნების ჩატარებაა.