საქართველოს ნაკრების ფეხბურთელი, ნიკა კვეკვესკირი ამბობს, რომ ჩრდილოეთ მაკედონიასთან მნიშვნელოვანი თამაშის დროს ვერ გაუძლეს წნეხს. მისი შეფასებით, ისინი არ აღმოჩნდნენ მზად "გამაყრუებელი სიჩუმის ფონზე" გამოცდისთვის. მის განცხადებას ფეხბურთის ფედერაცია ავრცელებს.

"ფაქტია, ვერ გავუმკლავდით წნეხს, ვერც ემოციურად და ვერც ფსიქოლოგიურად. ამ ყველაფერმა თამაშზე იმდენად დიდი გავლენა მოახდინა, რომ ჩვენც, ერთგული გულშემატკივრების მსგავსი ბრაზი და იმედგაცრუება გაგვიჩინა. როგორც აღმოჩნდა, ასეთი გამოცდისთვის "გამაყრუებელი სიჩუმის ფონზე" მზად არ ვიყავით. ძალიან მძიმე გაკვეთილი მოგვიმზადა საფეხბურთო ცხოვრებამ ამ ფორმაციის ნაკრებს", — აცხადებს ნაკრების წევრი.

როგორც ის წერს, ახლა უნდა გაკეთდეს სწორი დაკსვნები და ბრძოლა უნდა გაგრძელდეს.

საქართველოს ეროვნული ნაკრები ჩრდილოეთ მაკედონიის ნაკრებთან 12 ნოემბერს ანგარიშით 0:1 დამარცხდა.

ისტორიული მატჩი დინამო არენაზე ჩატარდა და მას კორონავირუსის მიერ გამოწვეული შეზღუდვების გამო, მაყურებელი არ ესწრებოდა. გამარჯვების შემთხვევაში საქართველოს ნაკრებს ისტორიაში პირველად ევროპის ჩემპიონატზე თამაშის შესაძლებლობა ექნებოდა.

მატჩის შემდეგ გამართულ პრესკონფერენციაზე მთავარმა მწვრთნელმა, ვლადიმერ ვაისმა გულშემატკივრებს ბოდიში მოუხადა და თამაშის შედეგზე პასუხისმგებლობა თავად აიღო. გარდა ამისა, ცნობილი გახდა, რომ ის თავის პოსტს ტოვებს.

გაიგეთ მეტი: