პარლამენტის თავმჯდომარის, არჩილ თალაკვაძის ინფორმაციით, ოპოზიციური პარტიები მეორე ტურისთვის უკვე ემზადებიან. რუსთავი 2-ის ეთერში მან ოპოზიციურ პარტიებთან დიალოგზე ისაუბრა.

არჩილ თალაკვაძის თქმით, კონსტრუქციულ გარემოში მათ შეძლეს, ერთმანეთისთვის მოესმინათ და არგუმენტები გაეცვალათ. მისივე თქმით, მოლაპარაკებების ერთ-ერთი შედეგი, მოკლევადიან პერსპექტივაში, იქნება ისიც, რომ ოპოზიციამ მეორე ტურში მიიღოს მონაწილეობა.

"ჩვენ უკვე გვაქვს ინფორმაცია, რომ ოპოზიციური პარტიები, ის პარტიები, რომლებიც მეორე ტურში გადავიდნენ მაჟორიტარულ ოლქებში, უკვე ემზადებიან მეორე ტურისთვის, მათ შტაბებში არის აქტიური სამზადისი, მოხდა სარეკლამო მასალების განახლება და მიდის მუშაობა", — აღნიშნა არჩილ თალაკვაძემ.

პარლამენტის თავმჯდომარემ გამართული პოლიტიკური დიალოგისას განხილული საკითხები პარლამენტის თავმჯდომარემ არ დააკონკრეტა.

"ჩვენ ყველამ პირობა დავდეთ, რომ შეთანხმებამდე არ გავასაჯაროებთ იმ საკითხებს, რაზეც იყო მსჯელობა. მე ვფიქრობ, არც საზოგადოებას არ სჭირდება დიალოგში ისეთი წარმომადგენლები, რომელთაც პირობის დაცვა არ შეუძლიათ და რომელიც თავის სიტყვას გატეხავს, ამიტომ თავს შევიკავებ", — აღნიშნა არჩილ თალაკვაძემ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე14 ნოემბერსაა დაგეგმილი.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. პირველი შეხვედრა აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრებოდა.