დალაი ლამამ მსოფლიოს ლიდერებს მოუწოდა, სასწრაფო ქმედებები განახორციელონ კლიმატის ცვლილების წინააღმდეგ, და გაგვაფრთხილა, რომ ეკოლოგიური კატასტროფა მილიარდობით ადამიანის სიცოცხლეს შეეხება და გაანადგურებს პლანეტას, მათ შორის მის მშობლიურ ტიბეტს.

დალაი ლამას თქმით, ბუდა რომ ახლა თანამედროვე სამყაროში დაბრუნებულიყო, "ბუდა მწვანე იქნებოდა". როგორც დალაი ლამამ 2011 წელს გამოაცხადა, ის პოლიტიკიდან წავიდა, თუმცა ეკოლოგია მისთვის "ძალიან, ძალიან მნიშვნელოვანია" და გვაფრთხილებს, რომ "გლობალურმა დათბობამ შეიძლება იმ დონეს მიაღწიოს, რომ მდინარეები დაშრეს".

"გაერომ ამ სფეროში უფრო აქტიური როლი უნდა ითავოს. დიდმა ერებმა ეკოლოგიას მეტი ყურადღება უნდა დაუთმონ. იმედი მაქვს, ეს დიდი ერები, რომლებიც უამრავ ფულს ხარჯავენ იარაღებსა და ომებზე, საკუთარ რესურსებს კლიმატის დაცვისკენ მიმართავენ", — თქვა მან.

დალაი ლამას თქმით, ის რომ ახლა პოლიტიკურ პარტიას შეერთებოდა, "მწვანეთა პარტიას შევუერთებოდი. მათი იდეა ძალიან კარგია".

მისი რჩევა, თუ როგორ უნდა მოხერხდეს, რომ მსოფლიოს ლიდერებმა უფრო რაციონალურად შეხედონ კლიმატის ცვლილებას, ცოტა საეჭვოა, თუმცა ის მისი გამორჩეული იუმორის გრძნობის გათვალისწინებით უნდა განვიხილოთ. დალაი ლამა იცინის და გვთავაზობს, რომ ლიდერები ერთ ოთახში უნდა გამოვკეტოთ, ოთახი კი "ნახშირორჟანგით უნდა გავავსოთ, სანამ არ მიხვდებიან, რას ნიშნავს სინამდვილეში კლიმატის ცვლილება". მისი თქმით, "ხალხი, რომელიც ფუფუნებაში ცხოვრობს, შესაფერისი ჟანგბადის გარეშე" გაიაზრებს, რომ "ეს ძალიან რთულია".

ფოტო: Noemi Cassanelli/AFP/Getty Images

დალაი ლამა ამბობს, რომ ის ხეების ფართომასშტაბიან დარგვას ემხრობა, რათა კლიმატის ცვლილებებს ხელი შეეშალოს. მას ასევე სწამს, რომ მსოფლიოში ხორცის მოხმარება რადიკალურად უნდა შემცირდეს, თუმცა ასევე ამბობს, რომ მას შემდეგ, რაც 1965 წელს ვეგეტარიანელობა გადაწყვიტა, ჯანმრთელობის პრობლემების გამო ექიმებმა ურჩიეს, ცოტა ხორცის მიღება ისევ განეახლებინა.

ლიდერის თქმით, კლიმატის ცვლილებასთან ბრძოლის მისი მთავარი პირადი წვლილი არის განათლება და თანაგრძნობის კონცეფციის წინ წამოწევა. ის განსაკუთრებული მოწადინებით 7 მილიარდი ადამიანის ერთიანობაზე საუბრობს: "ზედმეტად დიდ აქცენტს ვაკეთებთ საკუთარ ერზე, საკუთარ რელიგიასა თუ სხვის რელიგიაზე. სინამდვილეში, სწორედ ეს იწვევს ყველა ამ პრობლემას, რადგან განსხვავებული რელიგიები და განსხვავებული ერები ერთმანეთს ებრძვიან. ახლა ჩვენ ყველაზე მეტად ერთიანობა გვჭირდება".

რაც შეეხება კორონავირუსის პანდემიას, დალაი ლამა ამბობს: "თუკი არსებობს [კორონავირუსის] დაძლევის გზა, სანერვიულო არაფერია. თუკი მისი დაძლევის გზა არ არსებობს, მაშინ ნერვიულობა დიდად არც არაფერში დაგვეხმარება".