საქართველოს ბიზნეს ასოციაცია მთავრობისგან და ახლადარჩეული პარლამენტისგან ითხოვს, რომ უმოკლეს ვადებში მოხდეს ცვლილებების შეტანა საგადასახადო კოდექსში.

საშემოსავლო გადასახადთან დაკავშირებული ასოციაცია იმ შეღავათის დამატებით კიდევ 6 თვით გაგრძელებას ითხოვს, რომელიც 1 500 ლარამდე ხელფასებს შეეხებოდა. ასოციაცია, ასევე, ითხოვს, რომ ტურიზმისა და სტუმარმასპინძლობის ინდუსტრიას ჩამოეწეროს საქართველოს საგადასახადო კოდექსში 22 მაისს განხორციელებული ცვლილების საფუძველზე გადავადებული და დაგროვებული საშემოსავლო გადასახადი.

"გვინდა ხაზგასმით ავღნიშნოთ, რომ ზემოაღნიშული ორივე თხოვნა პირდაპირ კავშირშია და ემსახურება ჩვენს ქვეყანაში სამუშაო ადგილების შენარჩუნებას, რაც ვფიქრობთ, უნდა იყოს ნებისმიერი ჩვენთაგანის ერთ-ერთი მთავარი საზრუნავი. ვინაიდან, საქართველოს საგადასახადო კოდექსში ცვლილების შეტანა არის საქართველოს პარლამენტის უფლებამოსილება, საქართველოს ბიზნეს ასოციაცია გამოთქვამს სრულ მზადყოფნას პროფესიულ დისკუსიებში ჩაერთოს ყველა მხარესთან, რათა ძალიან სწრაფად, საქართველოს ახალი პარლამენტის პირველივე სხდომებზე მოხდეს ამ ცვლილებების განხილვა და შესაბამისი გადაწყვეტილების მიღება", — აცხადებენ ასოციაციაში.

საქართველოს ბიზნეს ასოციაცია აღნიშნავს, რომ ტურიზმისა და სტუმარმასპინძლობის ინდუსტრია პანდემიის გამო ერთ-ერთი ყველაზე მეტად დაზარალებული სექტორია და იგი პრაქტიკულად გაჩერებულია, ამ სექტორში მოღვაწე კომპანიათა უმრავესობას კი საკმაოდ მწვავე ხასიათის პრობლემები შეექმნებათ თუ ისინი 2020 წლის 1 დეკემბერს დაგროვილი საშემოსავლო გადასახადის გადახდის აუცილებლობის წინაშე დადგებიან.