Variety-ის ცნობით, ცნობილ დანიელ მსახიობ მადს მიკელსენთან მოლაპარაკებები მიმდინარეობს, რათა ჯადოსნური ცხოველების მესამე ნაწილში გრინდელვალდის როლზე ჯონი დეპი ჩაანაცვლოს.

ჰარი პოტერის ამ სპინოფ ფილმების სერიის პირველ ორ ფილმში მონაწილეობის შემდეგ 6 ნოემბერს მსახიობმა ჯონი დეპმა კინოსტუდია Warner Bros.-თან ერთად გაავრცელა ოფიციალური ინფორმაცია, რომ ამ როლზე უარს ამბობს. ეს გადაწყვეტილება მას შემდეგ გახდა ცნობილი, რაც დეპმა ლონდონში სასამართლო დავა წააგო: მოსამართლემ დაადგინა, რომ მსახიობი თავის ყოფილ ცოლზე, ამბერ ჰერდზე ძალადობდა.

ჯადოსნური ცხოველები 3-ის გადაღებები უკვე დაწყებულია დიდ ბრიტანეთში და როგორც ცნობილია, ჯონი დეპი მხოლოდ ერთ სცენაში იყო გადაღებული, შესაბამისად, მადს მიკელსენს უკვე გადაღებულ კადრებში თავიდან მონაწილეობა არ მოუწევს.

ამ 54 წლის მსახიობს მაყურებლები კარგად იცნობენ როგორც ცნობილ ფილმებში, ისე სერიალებში შესრულებული დასამახსოვრებელი როლებით, მათ შორის ისეთ გახმაურებულ პროექტებში, როგორებიცაა ფილმი ნადირობა (The Hunt) და სერიალი ჰანიბალი (Hannibal).

მადს მიკელსენი სერიალში ჰანიბალი.

ფოტო: NBC

აღსანიშნავია, რომ მართალია, ჯონი დეპი მომავალ ფილმში თავის როლს აღარ შეასრულებს და მიმდინარე გადაღებებში მხოლოდ მცირე ხნით იყო ჩართული, ამის მიუხედავად, ის თავის შეთანხმებულ ანაზღაურებას მაინც სრულად მიიღებს. ამის შესახებ ინფორმაცია 10 ნოემბერს გახდა ცნობილი: მსახიობს დაპირებული რვანიშნიანი გასამრჯელოს გადაუხდიან.

მნიშვნელოვანია, რომ ტექნიკურად კინოსტუდია Warner Bros.-ს ჯონი დეპი არ დაუთხოვია — მსახიობს სთხოვეს, რომ თავად ეთქვა როლზე უარი. დეპი ამ გადაწყვეტილებას დათანხმდა, თუმცა, როგორც ჩანს, ის არ აპარებს, რომ დიდხანს იყოს უმოქმედოდ:

"გაერთიანებული სამეფოს სასამართლოს დაუჯერებელი გადაწყვეტილება სიმართლისთვის ბრძოლის სურვილს ვერ გამიქრობს, ამიტომ გიდასტურებთ, რომ გასაჩივრებას ვაპირებ. მტკიცე აზრზე ვრჩები და გადაწყვეტილი მაქვს, დავამტკიცო, რომ ჩემ მიმართ ბრალდებები უსაფუძვლოა. ჩემს ცხოვრებასა და კარიერას ეს პერიოდი ვერ განსაზღვრავს", — განაცხადა მან.

სამართლიანობისთვის ბრძოლას აგრძელებს ამბერ ჰერდიც, რომელიც ლონდონის სასამართლომ უკვე სცნო დაზარალებულად:

"ძალიან მალე აშშ-ის სასამართლოში ჩვენ გაცილებით მეტ მტკიცებულებას წარვადგენთ, რათა სამართლიანობა აღვადგინოთ და ამბერ ჰერდის სიტყვის გამოხატვის უფლება დავიცვათ" — თქვეს ჰერდის ადვოკატებმა.