დაავადებათა ეროვნული ცენტრის ხელმძღვანელმა, ამირან გამყრელიძემ მთავარი არხის დირექტორზე, ნიკა გვარამიაზე განაცხადა, რომ "ვიღაცისგან წიხლი არ არის საწყენი".

"გუშინ რაც ბატონმა გვარამიამ პირადად ჩემდამი იკადრა, მე მას პასუხს არ ვცემ. სულ ცდილობენ, რომ პოლიტიკურ პროცესში ჩამითრიონ, არა ბატონებო, მე აპოლიტიკური პიროვნება ვარ. გუშინ დასმული იყო კითხვა ჩემდამი პოლიტიკური ქვეტექსტით, რა უნდა მექნა, არ გავეცი პასუხი, მერე ძალიან ცუდი განმარტებები გააკეთა. იცის, ამ არხის დირექტორმა, რომ არ ვეხები მე მას", — განაცხადა ამირან გამყრელიძემ.

წუხელ, ცესკოსთან წყლის ჭავლით დაშლილ აქციასთან დაკავშირებულ კითვაზე, შეიცავდა თუ არა, ეპიდსიტუაციიდან გამომდინარე, ეს ქმედება ვირუსის გავრცელების საფრთხეს, დაავადებათა ეროვნული ცენტრის დირექტორმა, ამირან გამყრელიძემ განაცხადა, რომ პოლიტიკურ კომენტარს არ გააკეთებს.

"ამ ტიპის კითხვებზე მე პასუხს არ ვიძლევი. მე მკითხეთ ქვეყანაში ეპიდსიტუაცია როგორია. რასაც თქვენ მეკითხებით, ეს პოლიტიკური კითხვაა. მე პოლიტიკურ კომენტარებს არ ვაკეთებ", — განუცხადა მან მთავარ არხს.

ამ პასუხის გამო კი მთავარი არხის დირექტორმა, ნიკა გვარამიამ გამყრელიძე პირდაპირ ეთერში გააკრიტია და შეურაცხმყოფელად მოიხსენია.