"ეს ხალხი ნაციონალურ მოძრაობას კი არა, პოლიტსაბჭოსა და ფრაქციას გამოეყო" - ასე აფასებს საქართველოს ყოფილი პრეზიდენტი მიხეილ სააკაშვილი რუსთავი 2-ის ეთერში ნაციონალურ მოძრაობაში განვითარებულ მოვლენებს.

"ეს ნაციონალურ მოძრაობაში პირველად არ მომხდარა. ნაციონალურ მოძრაობის ისტორიაში რაღაც კატეგორიის ადამიანები ყოველთვის მიდიოდნენ პარტიიდან. პარტია ცოცხალი ორგანიზმია - ამიტომ ჰქვია ენმ-საც და უკრაინაშიც ჩემს პარტიას მოძრაობა, რომ სულ წინ მიდიხარ. წინსვლის პროცესში რაღაც უჯრედები კვდებიან, რაღაც ახალი უჯრედები იბადებიან.

ეს არის განახლების პროცესი. ამ ფორმალურად მმართველ ჯგუფში იყო დაჭაობების ნიშნები. ისინი ყოფილი მაღალჩინოსნები არიან და ხალხოსნურ მოღვაწეობას ვერ მოერგნენ. მათ ვერ მოახერხეს განახლება და ჩამოშორდნენ პარტიას და ეს არის ძალიან დადებითი პროცესი".

ნაციონალური მოძრაობიდან გასვლის გადაწყვეტილება დეპუტატების და პარტიის წევრების ნაწილმა 13 იანვარს დააანონსა. მათ ახალ პარტიას სახელად ევროპული საქართველო ჰქვია.